Jehofa o ile a kgetha Jeremia gore e be moporofeta wa batho ba nageng ya Juda. O ile a mmotša gore a rute batho ka yena le go ba botša gore ba tlogele go dira dilo tše mpe. Jeremia o ile a re: ‘Aowa Jehofa, ke sa le mošemanyana. Ga ke kgone go bolela le batho.’ Jehofa a re go yena: ‘O se ke wa tšhaba. Ke tla go botša seo o swanetšego go ba botša sona. Ke tla go thuša.’

Jehofa o ile a botša Jeremia gore a kgoboketše banna ba bagolo ba setšhaba, a pšhatlaganye legapa la letsopa pele ga bona gomme a re: ‘Jerusalema e tlo pšhatlaganywa go swana le legapa le.’ Ge Jeremia a dira seo Jehofa a mmoditšego sona, banna ba bagolo ba setšhaba ba ile ba galefa kudu. Moperisita yo a bitšwago Pashuri o ile a itia Jeremia gomme a mo tlemelela selong seo se dirilwego ka mapolanka. Jeremia o ile a fetša bošego ka moka a sa kgone go šutha. Mesong e latelago, Pashuri o ile a mo tlemolla. Ke moka Jeremia a botša Jehofa a re: ‘Nna ga ke sa kgona. Nka se sa botša batho ka wena.’ Eupša na Jeremia o ile a tlogela go botša batho ka Jehofa? Aowa. Ka morago ga gore a naganišiše ka seo a se boletšego, o ile a re: ‘Molaetša wa Jehofa o mphiša go swana le mollo ka gare ga ka. Ga ke kgone go tlogela go botša batho ka yena.’ Jeremia o ile a tšwela pele a botša batho gore ba tlogele go dira dilo tše mpe.

Go ile gwa feta mengwaga e mentši, gomme gwa ba le kgoši e mpsha ya Juda. Baperisita le baporofeta ba maaka ba be ba sa rate seo Jeremia a bego a se bolela. Ka gona ba botša dikgošana tša setšhaba ba re: “Hle anke monna yo a bolawe.” Jeremia a re go bona: ‘Ge le ka mpolaya, le tla ba le bolaya motho yo a se nago molato, ka gobane molaetša wo ke o bolelago ga se wa ka, eupša ke wa Jehofa.’ Ge dikgošana di ekwa seo, tša re: ‘Monna yo ga se a swanelwa ke go bolawa.’

 Jeremia o ile a tšwela pele a botša batho molaetša wo o tšwago go Jehofa, gomme dikgošana tša galefa kudu. Di ile tša kgopela kgoši gore e bolaye Jeremia. Kgoši e ile ya botša dikgošana tšeo gore di dire seo di se ratago ka Jeremia. Dikgošana tšeo di ile tša tšea Jeremia gomme tša mo lahlela ka moleteng wa go iša fase woo o bego o tletše leraga. Di be di nyaka gore a hwele ka moo. Jeremia o ile a thoma go sobelela lerageng leo.

Ke moka Ebede-meleke, e lego monna yo a bego a šoma ka ntlong ya kgoši Tsedekia, o ile a ya go Tsedekia gomme a fihla a re: ‘Dikgošana di lahletše Jeremia ka moleteng! Ge re ka se mo ntšhe, o tla hwela ka moo.’ Kgoši ya botša Ebede-meleke gore a sepele le banna ba 30 gomme ba yo ntšha Jeremia ka moleteng woo. Le rena re swanetše go swana le Jeremia, re se ke ra tlogela go botša batho ka molaetša wa Jehofa.