Jiihóvah yá halneʼii jidooleeł biniyé Jeremáíyah éí Jiihóvah náhodiiłtı̨́. Júdah dineʼé doo yáʼátʼéehii baa nijikaígíí neʼ kódaahłééh bididííniił, hałní. Jeremáíyah ájíní: ‘Shoo Jiihóvah, tʼahdii yeeʼ ashkii nishłı̨́. Diné bichʼįʼ hadeesdzihgo doo bíneeshʼą́ą da.’ Jiihóvah áháłní: ‘Tʼáadoo náníldzidí, hadíídzihgi bee nił hodeeshnih, áádóó níká adeeshwoł.’

Jiihóvah éí náás daazlı̨́įʼii bidáahgi hashtłʼish ásaaʼ didííłtahgo kódidííniił, hałní: ‘Jerúsalem kótʼéego didooltah.’ Díí biʼjiilaago, náás daazlı̨́įʼii bádahóóchįįd. Nááʼiiłniihii Pásher náhoneesxaalgo tsin bigházhdéesʼeezgóó bigházhdéesʼníihgo áhoolaa. Tʼáadoo nihiiʼnání hwiiską́. Abínígo hwéédoochidgo Jeremáíyah ájíní: ‘Kóshiʼdilʼı̨́ doo bíneeshʼą́ą da, áko nahasneʼígíí neʼ kódeeshłííł.’ Hazhóʼó baa tsízdeezkéezgo ájíní: ‘Jiihóvah bá hashneʼígíí shiyiʼdę́ę́ʼ dookʼą́ą́ł nahalin, áko hashneʼígíí doo neʼ óoshłeʼ átʼée da.’ Áko Jeremáíyah éí nahojilneʼgo ahoolzhiizh.

Tʼahádóó Júdahgi naatʼáanii ániidíii dah neezdáh. Náádaʼiiłniihii índa doo tʼáá aaníí dahalneʼii éí Jeremáíyah Jiihóvah bá hojilneʼgi deijoołá. Nantʼaʼí danilíinii ádeiłní: ‘Díí hastiin diyoolyééł.’ Jeremáíyah áháłní: ‘Dashisoołhı̨́įgo éí diné baʼátʼeʼ ádinii dasoołhı̨́į doo. Jiihóvah bizaad bee yáshtiʼ, tʼáá shí shizaad éí dooda.’ Díí deidiiztsʼą́ąʼgo ádaaní: ‘Díí hastiin doo diyoolyéeł da.’

Jeremáíyah tʼáá nahojilneʼgo nantʼaʼí danilíinii yéigo bádahachįʼ. Naatʼáanii éí Jeremáíyah diyííłhééł  deiłní. Éí ábíłní: ‘Tʼáá nihí danohsinígi ádaohłééh.’ Jeremáíyah deisiłgo tó bá azʼą́ą́ góyaa dazhdootsaał biniyé adahwiisxan. Ákóyaa éí tó ádin, hashtłʼish tʼéiyá, áko hashtłʼish biih jíítłizh.

Courtgi bóhólníihii łaʼ Ííbed-míílek wolyé, éí naatʼáanii ííłní: ‘Jeremáíyah tó bá azʼą́ą́ góyaa adayiisxan lá. Tʼáá ákóyaa sidáago éí dadootsaał.’ Ííbed-míílek éí hastóí tádiin yiltʼéego ákǫ́ǫ́ dííʼishgo Jeremáíyah háádadoołtééł hoʼdooʼniid. Jeremáíyah nahalingo Jiihóvah bá nahwiilneʼgi tʼáá haʼátʼíhídaásh nihitsʼą́ą́ʼ neʼ kwíidoolííł?