Jehová Diosqa Jeremiasta ajllarqa Judapi profeta kananpaj. Payqa runasman willanan karqa sajra imasta manaña ruwanankuta. Jeremiasqa nerqa: “Jehová Diosníy, jovenllaraj kani, nitaj sumajta parlayta atinichu”, nispa. Diostaj nerqa: “Ama manchikuychu, noqa yanapasqayki, imatachus ninaykitapis nisqayki”, nispa.

Jehová Diosqa Jeremiasta nerqa llajtamanta kuraj runasta tantaykuspa, ñaupaqenkupi uj pʼuñuta pʼakinanta. Nillarqataj kayta ninanta: “Kikillantataj Jehová Diosqa Jerusalenwan ruwanqa”, nispa. Chayta uyarispataj kuraj runasqa mayta phiñakorqanku. Sacerdote Pasurqa Jeremiasta seqʼospa maderamanta cepoman japʼiykucherqa. Jeremiastaj chaypi tutantin mana kuyuriyta aterqachu. Pasurqa qʼayantin paqarinraj Jeremiasta phaskararqa. Jeremiastaj nerqa: “Manaña aguantanichu. Niña willasajchu”, nispa. Sumajta tʼukurispataj nerqa: “Willallasajpuni, Diospa nisqasnenqa sonqoypi nina jina ruphaykuwan”, nispa. Chayrayku payqa willallarqapuni.

Aswan qhepamantaj, Judapi waj reyñataj karqa. Sacerdoteswan llulla profetaswanqa mana munarqankuchu Jeremías willananta. Chayrayku autoridadesman nerqanku: “Kay runaqa wañunan tiyan”, nispa. Jeremiastaj nerqa: “Wañuchiwankichej chayqa, mana juchayoj runata wañuchinkichej. Noqaqa Jehová Diospa nisqallanta willani”, nispa. Chayta uyarispataj autoridades nerqanku: “Kay runataqa mana wañuchisunmanchu”, nispa.

Jeremiasqa willallarqapuni. Autoridadestaj mayta phiñakuspa, reyman nerqanku Jeremiasta  wañuchinanta. Reytaj nerqa: “Qankuna imanaychejpis”, nispa. Chayrayku Jeremiasta uj pozoman wijchʼuykorqanku. Chay pozopeqa tʼurulla kasharqa, Jeremiastaj pisimanta pisi chay tʼuruman chinkaykusharqa.

Ebed-melecqa kamachina wasipi kuraj kamachi karqa. Paytaj reyman nerqa: “Autoridadesqa Jeremiasta uj pozoman wijchʼuykunku. Mana orqhomojtinchejqa, chaypi wañonqa”, nispa. Reytaj Ebed-melecta kamacherqa 30 runasta pusariykukuspa, Jeremiasta orqhomoj rinanta. Jeremiastaj willallarqapuni. Noqanchejpis Jeremías jina ruwayta munanchej.