Jeremiasqa karqa Juda nacionpi Jehova Diosmanta willakuqmi. Diosmi kamachirqa mana allin runakunata rimapayananpaq, chaymi Jeremias nirqa: “Diosnilláy warmallaraqmi kani, runakunapa qayllanpi rimaytapas manchakunim”, nispa. Diosñataqmi nirqa: “Ama pitapas manchakuychu. Ñuqam yanapasqayki”, nispa.

Diosmi Jeremiasta nirqa: “Autoridadkunata huñuruspaykim qayllankupi allpamanta aysakuta pakiparunki, hinaspam ninki: ‘Kaynam kay Jerusalen llaqtapas kanqa’”, nispa. Chaynata Jeremias ruwaruptinmi autoridadkunaqa llumpayta piñakururqaku, hinaptinmi sacerdote Pasurqa Jeremiasta azotespa makintawan chakinta uchkuyuq tablaman hinarurqa. Paqarinnintin kachaykuptinmi Jeremiasqa nirqa: “Manañam Diosmantaqa willakusaqchu”, nispa. Ichaqa allinta yuyaymanaykuspanmi nikurqa: “Diospa palabranqa nina hinaraqmi sunquypi rupachkan, manam willakuytaqa saqisaqchu”, nispa. Chaymi Jeremiasqa hinalla willakurqa.

Watakuna pasaytam hukña kamachirqa. Jeremiastaqa hinallam chiqnirqaku, chaymi sacerdotekunawan Diosmanta yanqa willakuqkunaqa jefekunata nirqaku: “Wañunanmi”, nispanku. Jeremiasñataqmi nirqa: “¿Imaynataq mana huchayuq runataqa wañuchiwankichik? Ñuqataqa Jehova Diosmi kachamuwarqa uyarisqaykichikkunata willanaypaq”, nispa. Chaymi jefekunaqa mana wañuchiyta munarqakuchu.

Jeremiasñataqmi hinalla willakurqa, jefekunam ichaqa piñakururqaku, hinaspam kamachiqta nirqaku Jeremiasta wañuchinanpaq. Hinaptinmi  kamachiqpa runankunaqa Jeremiasta uchkuman wischuykurqaku cenegarunanpaq.

Kamachiqpa wasinpi nanachikuq Ebed-melecñataqmi kamachiqta nirqa: “Jeremiastam uchkuman wischuykunku, hinapi saqiruptinchikqa wañurunqam”, nispa. Chaymi kamachiqqa Ebed-melectawan 30 runakunata nirqa Jeremiasta hurqumunankupaq. Jeremiasqa mana manchakuspam Diosmanta willakurqa. Qampas paytayá qatipakuy.