О Јехова биринѓа е Еремија те овел пророко ки Јуда. Вакерѓа леске те проповединел е манушенге хем те вакерел ленге те на керен више лошна буќа. Ама, о Еремија пхенѓа леске: „Јехова ме сиум панда чхаво. На џанава со те вакерав е манушенге“. О Јехова вакерѓа леске: „Ма дара. Ме ка вакерав туке со те вакере. Ме ка поможинав тут“.

О Јехова вакерѓа е Еремијаске те кхедел е старешинен, те пхагел англи ленде јекх кхоро хем те вакерел ленге: „Исто аѓаар ка овел е Ерусалимеа“. Кеда о Еремија керѓа адава со вакерѓа о Јехова, о старешине хољанѓе бут. Јекх свештенико со викинела пе сине Пасхор, кхувѓа е Еремија хем чхивѓа лескере васта хем о пре ки каштунали клада. Цели рат, о Еремија нашти сине те мрдинел. О тајсутно диве, о Пасхор ослободинѓа ле. О Еремија вакерѓа: „Нашти више те издржинав акава. Нане више те проповединав“. Ама дали чаче керѓа адава? На. Кеда размислинѓа хари повише, ов вакерѓа: „Е Јеховаскере лафија тане сар јаг со тхабљона ки манде андре. Нашти те на проповединав“. О Еремија понадари да предупрединела сине е манушен.

Пало несаво време, ки Јуда ало нево цари. О свештеникија хем о ховавне пророкија мрзинена сине адава со вакерела о Еремија. Ола вакерѓе е кнезонге: „Акава мануш ваљани те мерел“. О Еремија вакерѓа: „Ако мударена ман, ка мударен мануше со нане криво. Ме вакерава е Јеховаскере лафија, а на мле“. Кеда о кнезија шунѓе адава, вакерѓе: „Акава мануш на ваљани те мерел“.

 О Еремија понадари да проповединела сине, адалеске о кнезија бут хољанѓе. Ола родинѓе таро цари те мударел е Еремија. О цари вакерѓе кај шај леа те керен со мангена. Ола леле е Еремија хем фрдинѓе ле ки јекх хор дупка пхерди чикенцар, хем мислинѓе кај адари ка мерел. О Еремија почминѓа те батинел ки чик.

О Авде-Мелех, кова со служинела сине ко царско дворо, вакерѓа е цареске: „О кнезија фрдинѓе е Еремија ки дупка! Ако мукхаја ле адари, ов ка мерел“. О цари вакерѓа е Авде-Мелехоске те лел пеа 30 манушен хем те икалел ле тари дупка. Со мислинеа, дали ваљани амен да те ова сар о Еремија кова со на мукхља ништо те чхинавел ле те проповединел?