O Jehova biringja e Eremija te ovel proroko ki Juda. Vakergja leske te propovedinel e manušenge hem te vakerel lenge te na keren više lošna bukja. Ama, o Eremija phengja leske: „Jehova me sium panda čhavo. Na džanava so te vakerav e manušenge“. O Jehova vakergja leske: „Ma dara. Me ka vakerav tuke so te vakere. Me ka pomožinav tut“.

O Jehova vakergja e Eremijaske te khedel e starešinen, te phagel angli lende jekh khoro hem te vakerel lenge: „Isto agjaar ka ovel e Erusalimea“. Keda o Eremija kergja adava so vakergja o Jehova, o starešine holjangje but. Jekh svešteniko so vikinela pe sine Pashor, khuvgja e Eremija hem čhivgja leskere vasta hem o pre ki kaštunali klada. Celi rat, o Eremija našti sine te mrdinel. O tajsutno dive, o Pashor oslobodingja le. O Eremija vakergja: „Našti više te izdržinav akava. Nane više te propovedinav“. Ama dali čače kergja adava? Na. Keda razmislingja hari poviše, ov vakergja: „E Jehovaskere lafija tane sar jag so thabljona ki mande andre. Našti te na propovedinav“. O Eremija ponadari da predupredinela sine e manušen.

Palo nesavo vreme, ki Juda alo nevo cari. O sveštenikija hem o hovavne prorokija mrzinena sine adava so vakerela o Eremija. Ola vakergje e knezonge: „Akava manuš valjani te merel“. O Eremija vakergja: „Ako mudarena man, ka mudaren manuše so nane krivo. Me vakerava e Jehovaskere lafija, a na mle“. Keda o knezija šungje adava, vakergje: „Akava manuš na valjani te merel“.

 O Eremija ponadari da propovedinela sine, adaleske o knezija but holjangje. Ola rodingje taro cari te mudarel e Eremija. O cari vakergje kaj šaj lea te keren so mangena. Ola lele e Eremija hem frdingje le ki jekh hor dupka pherdi čikencar, hem mislingje kaj adari ka merel. O Eremija počmingja te batinel ki čik.

O Avde-Meleh, kova so služinela sine ko carsko dvoro, vakergja e careske: „O knezija frdingje e Eremija ki dupka! Ako mukhaja le adari, ov ka merel“. O cari vakergja e Avde-Melehoske te lel pea 30 manušen hem te ikalel le tari dupka. So mislinea, dali valjani amen da te ova sar o Eremija kova so na mukhlja ništo te čhinavel le te propovedinel?