O Jehova birindža e Jeremija te ovel proroko ki Juda. Phendža ljese te propovedini e manušendže hem te vačeri ljendže te na čeren više lošna buča. Ama, o Jeremija phendža ljese: „Jehova, me pana hijum čhavoro. Na džanava sar te vačerav e manušencar.“ O Jehova phendža ljese: „Ma dara. Me ka vačerav tuče so te phene. Me ka pomožinav tut.“

O Jehova phendža e Jeremijase te čedel e starešinen, te phagel anglo ljende jekh khoro hem te phenel ljendže: „O Jerusalim isto adžahar ka ovel uništimo.“ Ked o Jeremija čerdža odova so phendža o Jehova, o starešine but holjandže. Jekh sveštenik kaso nav hine Pashor, mardža e Jeremija hem čhivdža ljese vasta hem ljese pre ki kaštunalji klada. Celo rat, o Jeremija naštindža te mrdini. Tajsato dive, o Pashor oslobodindža lje. O Jeremija phendža: „Našti više te izdržinav akava. Na mangava više te propovedinav.“ Ama, da li čače hine adžahar? Na. Ked razmislindža hari pobuter, ov phendža: „E Jehovase lafija tane sar jag so thabljola ano mande. Našti te na propovedinav.“ O Jeremija nastavindža te upozorini e manušen.

Palo disavo vreme, ki Juda alo nevo kralj. O sveštenikija hem o hovavne prorokija mrzindže odova so vačerdža o Jeremija. On phendže e manušendže kola hine knezija: „Akava manuš valjani te merel.“ O Jeremija phendža: „Ako mudarena man, ka mudaren e manuše kova nane krivo. Me vačerava e Jehovase lafija, a na meklje.“ Ked o knezija šundže odova, phendže: „Akava manuš na valjani te merel.“

 O Jeremija hem ponodri propovedindža, odoljese o knezija but holjandže. On rodindže ando kralj te mudari e Jeremija. O kralj phendža so oljeja šaj te čeren so god mangena. On ljelje e Jeremija hem fordindže lje ki jekh hor jama koja hine pherdi čikaja hem mislindže so uduri ka merel. O Jeremija počmindža te batini ki čik.

O Avdemeleh, kova služindža ko e kraljeso dvoro, phendža e kraljose: „O knezija fordindže e Jeremija ki jama! Ako mukhaja lje uduri, ov ka merel.“ O kraljo phendža e Avdemelehese te ljel peja 30 manušen hem te ikalji lje andi jama. So mislineja, da li hem amen valjani te ova sar o Jeremija kova na mukhlja ništa te čhinavi lje te propovedini?