О Иегова стодя лэ Иеремияс, кай во тэ авэл пророко. О Иеремия трэбуй сас тэ росԥэнэн пала Дэл лэ манушэнди, савэ жувэнас андэ царство Иуды и тэ ԥэнэн, кай вонэ тэ парудён. Но о Иеремия ԥэндя: «Иегова, мэ фартэ тэрно важ кацави дила. Мэ на ӷанав, сар тэ дав дума лэ народоса». Но о Иегова лэсти ԥэндя: «На дар. Мэ тут сытярава и поможысарава, сар тути тэ дэс дума».

О Иегова ԥэндя лэ Иеремиясти тэ стидэл лэ барэдэрэн анда народо и тэ розмарэл англа лэндэ о кувшино, саво анда ӷлина. Инке во трэбуй сас тэ ԥэнэн лэнди: «Кадяжэ авэла розмардо о Иерусалимо». Кала о Иеремия стердя вся кадя, сар ԥэндя о Иегова, кадэла барэдэра фартэ холяйлэ. О рашай, савэс ақарэн Пашхуро, дядап лэ Иеремияс и стодя пэр лэстэ каштунэ наручникоря, пэ када ԥэнэн колодки. Лэ Иеремиясти сас фартэ ԥарэс и во вся и рят нащи бандёлас. Пэ авэр тэсара о Пашхуро вимэкля лэс. О Иеремия ԥэндя лэ Иеговасти: «Мандэ будэр нинай зор. Мэ будэр на лава тэ росԥэнав важ тутэ». Но чаче во умэкля и вас? Най. Сар во набут погиндосардя, во ԥэндя: «Кода, со мэ росԥэнав важ о Иегова када, сар яг андэр мандэ. Мэ нащи ашав мулком». И тоди о Иеремия упалэ ля тэ росԥэнэн важ о Дэл.

Прожылэ бэрша. И андэ Иуда ля тэ правий авэр царё. И рашая и пророкоря, савэ ԥэнэнас о найчачимос, вэрыцынас кода, со о Иеремия росԥэнэнас. Вонэ ԥэндэ лэ князёнэнди: «Кадэлэ манушэс трэбуй тэ умарэн». О Иеремия ԥэндя: «Мэ найдошало, ман най васо тэ умарэн. Мэ ԥэнав най пэстирэ алава, ай кода, со ԥэнэн о Иегова». Пэ када и князёря ԥэндэ: «Кадэлэ манушэс нащи тэ умарэн».

 После када о Иеремия упалэ ля тэ росԥэнэн важ о Дэл, и пэ кадэва разо и князёря фартэ росхоляйлэ. Вонэ манглэ лэ царёс, кай во тэ умарэл лэ Иеремияс. О царё ԥэндя: «Терэн лэса, со камэн». И князёря хутилдэ лэ Иеремияс и шутэ лэс андэ бари хаинг, кай сас ԥэрдо чик, кай во котэ тэ мэрэл. О Иеремия ля тэ тасол андэ чик.

Тоди ек мануш, савэс ақарэнас Авдемелехо, саво терэлас дила кай о царё, ԥэндя лэсти: «И князёря шутэ лэ Иеремияс андэ хаинг! Сар амэ лэс котэ ашаваса, во мэрэла!» О царё мэкля, кай о Авдемелехо тэ лэл пэса 30 манушэн и тэ вилэн лэ Иеремияс анда хаинг. Сытён кай о Иеремия, саво на пэрэдарайля и на парашэля тэ росԥэнэн важ о Дэл.