Na filifilia e Ieova Ieremia e avea o se perofeta i tagata o Iuta. Na ia faatonuina Ieremia ina ia talaʻi i tagata, ma lapataʻi i latou e taofia le faia o mea leaga. Na tali atu Ieremia: ʻIeova e, ua na o aʻu o se tamaitiiti. Ou te lē iloa le auala e tautala atu ai i tagata.’ Na faapea mai Ieova iā te ia: ʻAua e te fefe. O le a ou tuu atu upu i lou gutu. O le a ou fesoasoani iā te oe.’

Na faapea atu Ieova iā Ieremia e faapotopoto toeaina o le nuu, ona nutililii lea o se fagu omea i o latou luma ma fai atu: ʻE faapea foʻi ona nutililiia Ierusalema.’ Ina ua faia e Ieremia le faatonuga a Ieova, ona matuā feita ai lea o toeaina o le nuu. Na fasi Ieremia e se ositaulaga e igoa iā Pasura ma loka o ia i laau faamau. E leʻi mafai e Ieremia ona minoi i le pō atoa. Sa faasaʻoloto o ia e Pasura i le taeao na sosoo ai. Na faapea ifo Ieremia: ʻUa ou lē lavā onosaia nei mea. Ou te lē toe talaʻi.’ Ae pe na ia lē toe talaʻi ai? E leai. Ina ua toe mafaufau lelei Ieremia, ona ia faapea ane lea: ʻUa pei le feʻau a Ieova o se afi e mumū i totonu iā te aʻu. E lē mafai ona ou lē talaʻi atu.’ Na faaauau pea ona lapataʻia e Ieremia tagata.

Ua mavae ni tausaga ona iai lea o se tupu fou i Iuta. Na lē fiafia ositaulaga ma perofeta pepelo i le feʻau a Ieremia. Na latou fai atu i perenise: ʻE tatau ona oti lenei tagata.’ Na tali atu Ieremia: ʻPe a outou fasiotia aʻu, o le a outou fasiotia se tagata e lē sala. O loo oʻu taʻu atu fetalaiga a Ieova ae e lē o oʻu manatu.’ Ina ua faalogo perenise i le tali a Ieremia, ona latou faapea mai lea: ʻE lē tatau ona oti lenei tagata.’

Na faaauau pea ona talaʻi Ieremia, ma na matuā feita ai perenise. Na  latou talosaga atu i le tupu ina ia fasiotia Ieremia. Na fai atu le tupu e pule i latou i le mea e mananaʻo e fai iā Ieremia. Ona latou ave lea o Ieremia ma lafo i totonu o se vaieli loloto ma palapalā, ma manatu o le a oti ai Ieremia i inā. Na amata ona magoto ifo Ieremia i le palapala.

Ona faapea atu lea i le tupu o se tagata aloaʻia i le maota o le tupu e igoa iā Epetemeleka: ʻUa lafo e perenise Ieremia i le vaieli. Pe afai e tuu ai pea o ia i inā, o le a oti o ia.’ Na faatonu e le tupu Epetemeleka e ō ma ni tamāloloa e 30 e toso mai i luga Ieremia mai i le vaieli. Pe e lē tatau ona tatou faataʻitaʻi iā Ieremia, o lē e leʻi faatagaina so o se mea e taofia o ia mai i le talaʻi atu?