Jehova wakhetsa Jeremiya kutsi abe ngumphrofethi webantfu bakaJuda. Watsi akayoshumayela kulabantfu futsi abatjele bayekele kwenta tintfo letimbi. Jeremiya watsi: ‘Kodvwa Jehova, mine angikwati kukhuluma; ngisengumfana nje.’ Jehova watsi kuye: ‘Ungesabi. Mine ngitakutjela loko lokufanele ukusho. Futsi ngitakusita.’

Jehova watsi kuJeremiya akabite emadvodza lamadzala akaJuda, aphihlite imbita yelubumba embikwawo bese utsi: ‘IJerusalema itawuba njengalembita.’ Watsi Jeremiya nakakwenta loko Jehova bekamtjele kona, lamadvodza lamadzala akwata kakhulu. Umphristi Phashuri watsi Jeremiya akashaywe bese ufakwa esitokisini. Jeremiya bekangakhoni nekunyakata busuku bonkhe. Ngakusasa ekuseni Phashuri wamkhulula. Jeremiya watsi: ‘Ngeke ngisakhona kuphila ngalendlela. Ngitawuyekela kushumayela.’ Kodvwa wayekela mbamba yini kushumayela? Cha. Ngesikhatsi Jeremiya acabangisisa ngalendzaba watsi: ‘Umlayeto waJehova unjengemlilo lovalelwe ematsanjeni ami. Ngeke ngiyekele kushumayela.’ Jeremiya wachubeka ecwayisa labantfu.

Ngemva kweminyaka letsite kwabese kuba neNkhosi lensha kaJuda. Baphristi nebaphrofethi bemanga bebawenyanya umlayeto waJeremiya. Batjela tindvuna batsi: ‘Lomuntfu kufanele afe.’ Jeremiya watsi: ‘Nangabe ningibulala, nitawube nibulala umuntfu longenacala. Mine ngikhuluma lokuvela kuJehova.’ Nativa loku letindvuna tatsi: ‘Lomuntfu akukafanele abulawe.’

 Jeremiya wachubeka ashumayela, futsi letindvuna takwata kakhulu. Tatsi eNkhosini ticela kubulala Jeremiya. Lenkhosi yatsi tingenta nobe yini letiyifunako kuJeremiya. Tatsatsa Jeremiya tamjika emgodzini loneludzaka tinelitsemba lekutsi utofela khona. Jeremiya washobela kuloludzaka.

Ebedi Meleki watsi enkhosini: ‘Tindvuna tijikijele Jeremiya emgodzini loneludzaka! Nangabe simyekela lapha utawufa.’ Inkhosi yatsi ku-Ebedi Meleki akatsatse emadvodza langu-30 ahambe nawo bayokhipha Jeremiya kuloludzaka. Kufanele silingise Jeremiya, singavumeli lutfo lusente siyekele kushumayela.