Yehuwa němile si Yeremia makoạ nabi gunang tau Yehuda. I Sie něngoro si Yeremia pěgělị laingatẹ̌ su taumata tadeạu měngědo měkoạ barang dal᷊akị. Katewe i Yeremia nẹ̌bera, ’Yehuwa, iạ bědang mangudạ. Iạ tawe makapẹ̌bisara su bangsa ini.’ Yehuwa naul᷊ị, ’Abe katakụ. Iạ sarung maul᷊ị si kau apa harusẹ̌ habarengu. Iạ sarung mẹ̌tul᷊ung si kau.’

Yehuwa něngoro si Yeremia pěngomol᷊ẹ̌ manga těmbonangu bangsa ene, pěměka botol᷊ẹ̌ ěntana su těngong i sire, kụ pẹ̌bera, ’Yerusalem sarung ipakakodọ kere ini.’ Su tempong i Yeremia někoạ kěbị ene, manga těmbonang sěbạe nẹ̌pědu. Imang arenge i Pasyur něngoka si Yeremia kụ laede dingangu limane niwěntung. Su kanandụu hěbi, Yeremia tawe makakanoạ. Dịěllone mal᷊ukadẹ̌, Pasyur němělọ si sie. I Yeremia naul᷊ị, ’Iạ seng tawe makatahang. Iạ seng madiri měhabarẹ̌ tatanata ene.’ Katewe, apa i sie kahěngang-hěngang seng madiri? Tala. Su tempong i Yeremia saụ nẹ̌tiněna, i sie naul᷊ị, ’Tatanata bọu Yehuwa ene kere putung su ral᷊ungu wadangku. Iạ tawe makapěngědo měhabarẹ̌ ene.’ Yeremia turusẹ̌ mělẹ̌habarẹ̌ laingatẹ̌ su bangsa ene.

Pira taung bọu ene, piạ datu wuhu su Yehuda. Manga imang dingangu nabi palsu mawěnsing su habarẹ̌ lẹ̌habareng i Yeremia. I sire nẹ̌bera su manga pejabat, ’Tau ene harusẹ̌ mate.’ Yeremia naul᷊ị, ’Mạeng i kamene měmate si siạ, i kamene němate taumata tawẹ sal᷊ane. Iạ mělẹ̌habarẹ̌ bawerang i Yehuwa, bal᷊inẹ baweraku hala.’ Su tempong manga pejabat nakaringihẹ̌ ene, i sire naul᷊ị, ’Tau ini tawe wotonge pateng.’

Yeremia turusẹ̌ mělẹ̌habarẹ̌ tatanata bọu Mawu, kụ manga  pejabat sěbạe nẹ̌pědu si sie. I sire nẹ̌dorong tadeạu datu měmate si Yeremia. Datu nẹ̌bera i sire botonge měkoạ kere apa ikẹ̌kapulung i sire si Yeremia. Hakị u ene, i sire nẹ̌taho si Yeremia su pahighi maral᷊ung kụ su ral᷊unge piạ legẹ tadeạu i sie mate sene. Kadodọ-kadodọ i Yeremia kakạbonohe.

Bọu ene, petugas istana arenge Ebed-melekh naul᷊ị su Datu, ’Manga pejabat nẹ̌taho si Yeremia su pahighi! Mạeng balaěng, i sie sarung mate.’ Datu něngoro si Ebed-melekh pẹ̌bawa 30 esẹ sarang pahighi ene gunang měmol᷊eng si Yeremia. Yeremia tawe něngědo něhabarẹ̌ tatanatạ bọu Mawu maning apa nariadi. Apa i kitẹ lai mapulu turusẹ̌ měnginjilẹ̌ kere i Yeremia?