ISTÓRIA 57
Jeremias fó sai Jeová nia liafuan
Jeová hili Jeremias atu sai profeta iha Judá. Nia haruka Jeremias fó avizu ba povu atu husik sira-nia hahalok aat. Maibé Jeremias hatete: ‘Jeová, haʼu mak joven deʼit. Haʼu la iha matenek atu koʼalia ba ema.’ Jeová dehan ba nia: ‘Keta taʼuk. Haʼu sei hatete ba ó saida mak ó sei dehan. Haʼu sei ajuda ó.’
Loron ida, Jeová haruka Jeremias atu halibur katuas sira, harahun buli rai-mean iha sira-nia oin, no hatete: ‘Jeruzalein sei harahun hanesan neʼe.’ Bainhira Jeremias halo tuir buat neʼebé Jeová hatete, katuas sira sai hirus tebes. Amlulik ida naran Pasur baku Jeremias no xave metin ninia ain no liman. Kalan tomak, Jeremias labele book an. Iha dadeer Pasur husik fali nia. Jeremias hatete: ‘Haʼu la tahan ona. Haʼu lakohi fó sai ona lia-menon neʼe.’ Maibé nia rende an duni ka lae? Lae. Kuandu Jeremias hanoin didiʼak fali, nia hatete: ‘Jeová nia liafuan hanesan ahi neʼebé lakan makaʼas iha haʼu-nia laran. Haʼu labele para atu fó avizu.’
Tinan barak liu tiha, liurai foun mak komesa ukun Judá. Amlulik no profeta falsu sira la gosta lia-menon neʼebé Jeremias hatoʼo. Sira hatete ba ulun-naʼin sira: ‘Mane neʼe merese mate.’ Jeremias hatete: ‘Se imi oho haʼu, imi sei oho ema neʼebé la halo sala. Haʼu fó sai Jeová nia liafuan, laʼós haʼu-nia liafuan.’ Kuandu rona tiha neʼe, ulun-naʼin sira hatete: ‘Ita labele oho mane neʼe.’
Jeremias kontinua fó sai kona-ba Maromak nia liafuan, no ulun-naʼin sira mós sai hirus tebes. Sira husu ba liurai atu fó kastigu-mate ba Jeremias. Liurai hatete katak sira bele halo buat naran deʼit ba Jeremias. Tan neʼe, sira lori Jeremias no soe nia ba bee-posu neʼebé iha tahu barak, hodi hein katak nia sei mate. Neineik-neineik Jeremias komesa mout iha tahu laran.
Ema-boot ida iha palásiu naran Ebed-Melec hatete ba liurai: ‘Ulun-naʼin sira soe tiha Jeremias ba bee-posu laran! Se ita husik deʼit, nia sei mate.’ Liurai haruka Ebed-Melec atu lori mane naʼin-30 no dada sai Jeremias. Maski buat naran deʼit akontese, Jeremias la para atu fó sai Maromak nia liafuan. Ita mós bele sai hanesan nia, loos ka lae?
“Ema hotu sei odi imi tanba haʼu-nia naran. Maibé ema neʼebé tahan toʼo rohan mak sei hetan salvasaun.”—Mateus 10:22
Karik Ita sei gosta
HANORIN ITA-NIA OAN
Jeremias la para atu koʼalia kona-ba Jeová
Maski ema goza no sai hirus ba Jeremias, tanbasá mak nia la para atu koʼalia kona-ba Jeová?
VÍDEO INTRODUSAUN KONA-BA LIVRU SIRA IHA BÍBLIA
Introdusaun ba livru Jeremias
Maski hasoru susar oioin, maibé Jeremias kontinua halaʼo ninia serbisu nuʼudar profeta ho laran-metin. Hanoin kona-ba oinsá mak ninia ezemplu neʼe bele ajuda ema kristaun sira ohin loron.
ATIVIDADE ESTUDA NIAN
Hamriik metin ba buat neʼebé Ita fiar!
Buka-hatene saida mak ajuda Jeremias hodi fó sai avizu ba ema Judá.
