Finily i Jehovah ho mpaminany ta Joda agne ty Jeremia. Nirahe i Jehovah hitory naho hampitao o ndatio mba hiala amy ty fomba raty iareo reke. Hoe ty Jeremia: ‘Tsy mahay mitory raho Jehovah fa mbe ajaja!’ Hoe ty Jehovah: ‘Ko matahotse, fa hampeako rehe. Horehafeko ama’o ze toko’e horehafe’o.’

Nampipotehe i Jehovah siny tane tagnatreha o androanavi-pagnahio eo ty Jeremia sady hirehake tie: ‘Horavagne manahake itoy ka ty Jerosalema.’ Nahaboseke i androanavi-pagnahy rey izay. Jinera ty mpisorogne atao tihoe Pasora ty Jeremia, sady ginadra’e tamy ty bologan-katae. Tsy nahahetseke ty Jeremia. Le hoe reke tamy i mpisorogney naho fa nafahagne tamy ty hamaray igne: ‘Mafe zao. Ndraleoko tsy hitory sasa.’ Faie izay vata’e vao ty natao’e? Hoe reke naho fa nandineke soa: ‘Hoe afo agnateko ato ty saontsy i Jehovah, le tsy zìko.’ Le nitory avao reke.

Nisy mpanjaka vaovao ty ta Jodao tafara tatoy. Niheje o mpiso- rogneo naho o mpaminany sandokeo ty fitoria i Jeremia. Hoe iareo tamo o manam-boninahitseo: ‘Fagneva ty hovonoegne ty lahy tia.’ Faie hoe ty Jeremia: ‘Hamono ndaty tsy manan-tsiny nareo naho mamono ahy, satria ty saontsy i Jehovah ty torieko.’ Hoe iareo: ‘Tsy vonoegne reke ry kiahe.’

Mbe nitory avao ty Jeremia. Boseke i manam-boninahitse rey, le nirehake amy i mpanjakay fa toko’e hovonoegne reke. Le nenga i Mpanjakay iareo hanao ze tea’e hatao tamy i Jeremia. Le natora iareo tagnate lavake feno fotake  ty Jeremia, himateza’e ao. Nilenteke tagnate i fotakey ao ty Jeremia.

Nimbamy i mpanjakay mbeo ty mpanompo’e raike atao tihoe Ebeda-meleka. Hoe reke: ‘Ho mate ty Jeremia fa natora o manam-boninahitseo agnate lavake ao.’ Nagnirake i Ebeda-meleka naho ndaty 30 lahy i mpanjakay hagnakatse i Jeremia boake ao. Tsy natahotse nitory ty Jeremia. Hanahake aze ka vao tikagne?