ITYOUGH 57
Yehova Tindi Yeremia Ér A Za Pase Kwagh
Yehova yange tsua Yeremia ér a lu profeti ken tar u Yuda. Yehova kaa a na ér a pase Mbayuda kwagh shi a ta ve icin ér gba u vea de akaabo a ve lu eren la. Yeremia gema kaa a Yehova ér: ‘Kpa Yehova, mo m ngu wanye. M fa er me ôr ior mban kwagh ga.’ Yehova kaa a na ér: ‘De cian ga. Mo me kaa u kwagh u u ôr yô. Me wase u.’
Tsô Yehova kaa a Yeremia ér a lôhô mbatamen mba ken tar u Yuda cii ve kohol, nahan a hembe ityegh ki inyaagh sha ashe a ve, maa a kaa ér: ‘Kape a va hembe Yerusalem vough je ne.’ Yeremia eren kwagh u Yehova kaa ne yô, mbatamen mbara nyoon ishima a na. Tugh mbu gen yô, pristi ugen, iti na ér Pashur, gbidye Yeremia shi mande un igbe, tsa a mi. Tugh mbura cii Yeremia fatyô u tenger ga. Sev mbu aven yô, Pashur za dugh Yeremia igbe la kera. Tsô Yeremia kaa ér: ‘Me de u pasen kwagh. M ya ican kumam.’ Kpa yange de he? Ei. Yeremia yange hide shi hen sha kwagh u tom la seer, maa kaa ér: ‘Loho u Yehova ngu yeghen ken iyol yam er ka usu nahan. Me fatyô u den kwaghpasen ga.’ Tsô Yeremia za hemen u tan ior icin.
Anyom nga karen yô, orgen tema tor sha tar u Yuda. Shi upristi man uprofeti mbaaiev soo u ungwan loho u Yeremia lu ôron la ga. Nahan ve kaa a utyombaiorov mba ken Yuda ér: ‘Or ne kuma ku.’ Yeremia kaa a ve ér: ‘Aluer ne wuam yô, fa nen, ne wua or u lun a ishô. Ka akaaôron a Yehova m kaan ne ye, ka a am ga.’ Utyombaiorov mbara mba ungwan nahan yô, ve kaa ér: ‘Or ne kuma ku ga.’
Yeremia yange za hemen u pasen kwagh, nahan ishima vihi utyombaiorov a na kpishi. Ve za kaa a tor ér a wua Yeremia. Tsô tor kaa a ve ér kwagh u ve soo cii ve er a Yeremia. Nahan ve kôr Yeremia ve za kende un shin ijôr igen. Ijôr la lu a amgbiôr shimi kpishi. Yange ve soo ér a kpe shin ijôr shon. Yeremia yange hii u miren shin amgbiôr la.
Tsô orgen u eren tom hen ya u tor, iti na ér Ebedimeleki, ôr tor ér: ‘Utyombaiorov kende Yeremia shin ijôr igen! Aluer i de un ngu shimi yô, una kpe.’ Tor maa na Ebedimeleki zwa ér a za a iorov 30 ve za dugh Yeremia shin ijôr la kera. Yeremia yange de ér kwagh môm a yange un u pasen kwagh ga. Doo u se lu er un nahan gaa?
“Ior cii vea kôr ne ihyom sha ci u iti Yam; kpa u nana taver ishima zan zan mkur yô, ka nan nana war ye.” —Mateu 10:22
Kwagh Ugen u Alaghga Shi Una Doo U Yô
TESEN ÔNOV OU
Yeremia Yange De u Ôron Ior Kwagh u Yehova Ga
Shin er ior lahan Yerema shi nyoon ishima a na nahan cii kpa, er nan ve yange za hemen u ôron ve kwagh u Yehovaa?
UKAADE MBA PASEN KWAGH U IOR MBA KEN BIBILO
Kaade u Bibilo u A Er Kwagh u Yeremia Yô
Ka hanma shighe yange u tsua Yeremia ér a lu profeti? Gber kaade u Bibilo ne ôr fa.
UVIDIO MBA PASEN KWAGH U TAKERADA U BIBILO U ER YÔ
Kwagh u Takerada u Yeremia U Er La
Yeremia yange er tom u profeti u i na un la sha mimi shin er tagher a mtaver nahan kpaa. Hen ase er ikyav na la ia wase Mbakristu nyian yô.
Sha ci u Agumaior
Tile sha Kwagh u Ú Ne Jighjigh a Mi la Dông!
Ôr fa kwagh u yange wase Yeremia u pasen Mbayuda loho u tan ve icin la.
