Ja Jyoba stsaʼa ja Jeremías bʼa kʼot jun aluman ja bʼa slujmal Judá. Ja Dyos sjeka bʼa xcholjelyabʼ ja ixuk winike tiw sok yaljelyabʼ ayaʼekan skʼulajel ja jastik mi lekuk. Pe ja Jeremías sjakʼayi ja Jyoba: «Junto yal keremon, mi xnaʼa kʼumal bʼa stiʼ sat ja ixuk winiki». Ja Jyoba skʼapayi: «Mok xiwan, keʼn oj jkoltaya sok oj kalawabʼ ja jas oja wali».

Ja Jyoba yalyabʼ ja Jeremías a-stsom ja ansyanoʼik ja bʼa chonabʼi, ti spojo jun oxom bʼa stiʼ sat ja yeʼnle sok yala: «Jachni oj ekʼ sbʼaj ja Jerusalén». Yajni ja Jeremías skʼulan ja jaw, ja ansyanoʼik jel tajkiye. Jun sacerdote sbʼiʼil Pasjur smakʼa ja Jeremías sok slatsʼayi ja yok soka skʼabʼ bʼa jun lechan teʼ. Ja Jeremías mi bʼobʼ snik sbʼaj snajtil ja akwali. Ja Pasjur sijpan ja yajni el ja kʼakʼu. Anto ja Jeremías yala: «Mixa xkuchkuj. Ojxa kakan xcholjel». Pe ¿skʼulani maʼa? Miyuk. Ja Jeremías spensaraʼan lek sok yala: «Ja rason bʼa Jyoba jach jastal jun kʼakʼ ja bʼa kojoli. Mini xbʼobʼ kakan ja xcholjeli». Ja yuj ja Jeremías snochoyi yaljelyabʼ ja ixuk winiki.

Ekʼ ja jabʼili sok och jun pilan mandaranum ja bʼa Judá. Ja sacerdoteʼik soka alumanik mi tojuki yilkʼujolane ja srason ja Jeremías. Ja yuj yalawe yabʼ ja olomaliki: «Ja winik it sbʼejni oj chamuk». Ja Jeremías yala: «Ta amilawonex, ojni amilex jun winik mey smul. Kechan wa xkala ja jas yalunejkabʼ ja Jyoba, mi jaʼuk ja jas wa xkala ja keʼn». Yajni ja olomalik yabʼye ja it, yalawe: «Ja winik it mi sbʼejuk oj chamuk».

Ja Jeremías mi yaʼakan xcholjel, pe ja ekʼele it ja olomaliki jel tajkiye.  Skʼanaweyi ja mandaranum bʼa a-smile. Ja mandaranum yala a-skʼulukeyi chikan jas skʼanawe. Ja yuj syamawe sok sjipawe bʼa jun chaʼan poso bʼutʼel lokok bʼa ti oj cham tiw. Ja Jeremías takal takal och mukxuk.

Anto jun olomal bʼa snaj ja mandaranum sbʼiʼil Ébed-mélec yalyabʼ ja mandaranum: «Ja olomalik ti sjipuneje ja Jeremías bʼa jun poso. Tikʼa katikan tiw, ojni chamuk». Ja mandaranum yayi mandar ja Ébed-mélec ayi och 30 winike sok ayawe eluk. Ja Jeremías mini jas timji bʼa yajelkan xcholjel. ¿Anke waxa kʼana oj kʼotan jastal yeʼn?