Yahwe akakoma Yeremiya kuhereza nka nabbi hali abantu ba Yuda. Akamutuma kugenda kutebeza hamu n’okuhabura abantu ba Yuda kuleka kukora ebintu ebibi. Baitu uwe Yeremiya akamugarukamu ati: ‘Ai Yahwe, nyowe ndi mwana muto. Timanyire kubaliza omu bantu.’ Yahwe akamugarukamu ati: ‘Otatiina. Ninyija kukugambira eky’orabaza kandi ninyija kukukonyera’

Yahwe akagambira Yeremiya kusorooza abakuru boona kandi asasangule ekibindi k’ibumba omu maiso gaabo nagamba ati: ‘Nukwo na Yerusalemu erahwerekerra eti.’ Yeremiya obuyakozere Yahwe eky’akaba amugambiire, abakuru bakabiihirwa muno. Nyakatagara arukwetwa Pasura akateera Yeremiya, kandi emikono ye n’ebigere bye yabibohera omu mbaho nambere yaraire kuhikya obwire kukya. Habw’okubohwa omu mulingo gunu, Yeremiya atasobole kwehindura. Bakamulekera omu bwire bwa nyenkyakara. Obu bamulekiire, akagamba ati: ‘Tindukwija kugumizaamu n’okubonabona kunu, eby’okutebeza ningenda kubihwaho.’ Baitu mali Yeremiya akaleka kutebeza? Nangwa. Yeremiya obu yakitekeriizeho muno, akagamba ati: ‘Ekigambo kya Yahwe kiri nk’omurro omunda yange. Tinsobora kuleka kutebeza.’ Yeremiya akagumizaamu nahabura abantu.

Hanyuma y’emyaka nyingi, Yuda ekatunga omukama ondi. Banyakatagara hamu na banabbi ab’ebisuba bakaba batarukugonza obutumwa bwa Yeremiya. Bakagambira ababiito ngu: ‘Omusaija ogu asemeriire kufa.’ Yeremiya akabagarukamu ati: ‘Obu muranyita, nimwija kuba munyitiire busa habwokuba ebigambo ebindukubagambira bya Yahwe tibiri byange.’ Ababiito obu bahuliire ebigambo bya Yeremiya, bakagamba: ‘Omusaija onu tasemerire kufa.’

 Yeremiya akagumizaamu n’okutebeza baitu ababiito kikababiihiza muno kandi bakasaba omukama aite Yeremiya. Omukama akabagambira ngu bamukole kyona eki barukwenda. Bakakwata Yeremiya bamunaga omu iziba eriraihire kandi eriine esaabu nyingi nukwo afeeremu. Yeremiya akatandika kudikira omu saabu.

Omukuru omu ayakoraga omu kikaali arukwetwa Ebedimereki akagambira omukama ati: ‘Ababiito banagire Yeremiya omu iziba! Kandi obu turamulekayo naija kufa.’ Omukama akaragira Ebedimereki kugenda n’abaisaija abandi 30 nukwo baihe Yeremiya omu iziba. Naitwe titusemeriire kuba nka Yeremiya, ataraikiriize ekintu kyona kumulemesa kutebeza?