Yehova wakasankha Yeremiya kuti waŵe ntchimi ku Ŵayuda. Wakamutuma kuti wapharazgire ŵanthu na kuŵachenjezga kuti ŵaleke kuchita viheni. Yeremiya wakati: ‘Kweni Yehova, ndine msepuka, nkhumanya yayi kuyowoya na ŵanthu.’ Yehova wakamuphalira kuti: ‘Kopa yayi. Nikuphalirenge chakuti ukayowoye. Nikovwirenge.’

Yehova wakaphalira Yeremiya kuti wawunganye ŵalara ŵa Ŵayuda, na kuswa chiŵiya chadongo panthazi pawo. Ndipo wayowoye kuti: ‘Yerusalemu wazamusweka nga ntchiŵiya ichi.’ Yeremiya wakati wachita ivyo Yehova wakamuphalira, ŵalara ŵakakwiya chomene. Ntheura Pashuri uyo wakaŵa wasembe wakamutchaya Yeremiya na kumuŵika mu magwedi usiku wose, mwakuti wakasunkhunyikanga yayi. Ŵakati ŵamufumiska mulenji, Yeremiya wakati: ‘Naleka! Nipharazgengeso cha.’ Kasi wakaleka nadi? Yayi. Yeremiya wakati waghanaghanirapo, wakati: ‘Uthenga wa Yehova uli nga ni moto mukati mwane. Ningaleka yayi kupharazga.’ Yeremiya wakalutilira kuchenjezga ŵanthu.

Vyaka vikati vyajumphapo, Yuda wakamba kuwusika na fumu yinyake. Ŵasembe na ntchimi zitesi ŵakatinkhanga uthenga wa Yeremiya. Ŵakaphalira ŵakaronga kuti: ‘Munthu uyu wakwenera kufwa.’ Yeremiya wakati: ‘Usange mwanikoma, mukomenge waka munthu wambura mulandu. Ine nkhuyowoya mazgu gha Yehova, ghane yayi.’ Ŵakaronga ŵakati ŵapulika nthena, ŵakati: ‘Munthu uyu ngwakwenelera yayi kufwa.’

Yeremiya wakalutilira kupharazga, ndipo ŵakaronga ŵakakwiya chomene. Ŵakapempha themba kuti ŵamukome Yeremiya. Fumu yikaŵaphalira kuti ŵachite nayo chilichose icho ŵakukhumba. Ŵakamutora Yeremiya na kumuponya mu chisimi chitali umo mukaŵa mathipa. Ndipo ŵakaghanaghananga kuti wafwirenge mwenemumo. Yeremiya wakamba kubira mu mathipa.

Ebedimeleki uyo wakaŵa wantchito wa themba wakaphalira themba kuti: ‘Ŵakaronga ŵamuponya Yeremiya mu chisimi! Usange tingamuleka mwenemumo, wafwenge.’ Fumu yikaphalira Ebedimeleki kuti watore ŵanalume 30 kuti ŵakamufumiske Yeremiya mu chisimi. Mphanyi nase taŵa nga ni Yeremiya uyo wakazomerezga chilichose yayi kuti chimulekeske kupharazga.