Ua maiti Iehova ia Ieremia ei peropheta no te nunaa o Iuda. Ua parau Iehova ia Ieremia ia haere e poro i te nunaa e ia faaite ia ratou ia faaea i te rave i ta ratou mau ohipa ino. Ua na ô Ieremia: ‘E Iehova e, e au vau i te tamaiti iti. Eita vau e ite e nafea ia paraparau i te nunaa.’ Ua pahono atu Iehova: ‘Eiaha e mǎtaˈu. E faaite au ia oe eaha te parau. E tauturu vau ia oe.’

Ua parau Iehova ia Ieremia ia haaputuputu i te mau matahiapo o te nunaa, ia haaparari i te hoê farii araea i mua ia ratou e ia parau atu: ‘Mai teie farii tei parari huˈahuˈa to Ierusalema faahopearaa.’ A faaite ai Ieremia i ta Iehova i parau, ua riri roa te mau matahiapo. Ua taparahi te hoê tahuˈa, o Pasura to ˈna iˈoa, ia Ieremia e ua tuu oia i to Ieremia na rima e avae i roto i te raau. I te roaraa o te po, aita Ieremia i nehenehe e hauti. I te poipoi aˈe, ua faatiamâ Pasura ia Ieremia. Ua parau Ieremia: ‘Ua oti roa vau. E faaea vau i te poro.’ Ua tuu anei râ Ieremia? Aita. Ua feruri atu â Ieremia e ua na ô oia: ‘E au te poroi a Iehova i te hoê auahi i roto ia ˈu. Aita vau e nehenehe e faaea i te poro.’ Ua tamau Ieremia i te faaara i te nunaa.

Ua mairi te mau matahiti. E arii apî to Iuda. Mea riri roa na te mau tahuˈa e te mau peropheta haavare te poroi a Ieremia. Ua faaite ratou i te hui arii: ‘Ia pohe teie taata!’ Ua parau Ieremia: ‘Mai te peu e e haapohe outou ia ˈu, e haapohe outou i te hoê taata hapa ore. Te faaite nei au i te mau parau a Iehova, eiaha râ i ta ˈu iho mau parau.’ A faaroo ai te hui arii i te reira, ua na ô ratou: ‘Eita teie taata e tia ia pohe.’

Ua tamau Ieremia i te poro e ua riri roa te hui arii. Ua ani ratou i te arii ia haapohe ia Ieremia. Ua parau atu te  arii ia rave i ta ratou i hinaaro i nia ia Ieremia. Ua rave ïa te hui arii ia Ieremia e ua taue ratou ia ˈna i roto i te hoê apoo vari hohonu ia pohe oia. Ua haamata Ieremia i te mure i roto i te vari.

I muri iho, ua parau te hoê taata toroa, o Ebeda-Meleka to ˈna iˈoa, i te arii: ‘Ua taue te hui arii ia Ieremia i roto i te hoê apoo pape! Ia vaiiho tatou ia ˈna i reira, e pohe oia.’ Ua faaue te arii ia Ebeda-Meleka ia rave e 30 taata e ia haere e iriti ia Ieremia i rapae i te apoo. Aita Ieremia i vaiiho i te tahi noa ˈˈe mea e tapea ia ˈna ia poro. E hiˈoraa maitai to Ieremia no tatou, e ere anei?