Иегова Иеремияны медээчи кылдыр томуйлап каан. Ол Иудада улуска суртаалдап, оларны багай ажыл-херектеринден адырлып алырынче оттурар ужурлуг турган. Ынчалза-даа Иеремия: «Чон-биле канчаар чугаалажырын билбес-тир мен, ам-даа аныяк мен» — дээн. Иегова аңаа: «Кортпа, сеңээ чүнү чугаалаарын өөредип каар мен. Сеңээ дузалажыр мен» — деп харыылаан.

Иегова Иеремияны чоннуң баштыңнарын чыггаш, оларның мурнунга дой доңганы бускаш: «Иерусалим база шак мынчаар буурап, бустур деп чугаала» — дээн. Иеремия ынчаар кылыптарга, баштыңнар аажок хорадап эгелээн. Пашхур дээр өргээ бараалгакчызы Иеремияны эттээш, доорбаш ыяшка хол-будун кыстыртып каан. Иеремия хондур шимчеп чадап каан, аңаа дыка аарышкылыг турган. Даң бажында Пашхур ону салыпкан. Иеремия Иеговага: «Оон ыңай шыдавас-тыр мен, моон соңгаар суртаалдавас мен» — дээн. Иеремия холун сула салыпканы ол бе? Чок. Ол кезек бодангаш: «Иегованың медээзи иштимде хып турар от дег-дир, ыыттавайн барып шыдавас-тыр мен» — деп чугаалааш, суртаалын уламчылаан.

Чылдар эрткенде, Иудага өске хаан чагырып эгелээн. Өргээ бараалгакчылары болгаш меге медээчилер Иеремияның суртаалынга хөңнү чок турган. Ынчангаш олар нояннарга: «Бо кижини өлүрер херек» — дээн. Иеремия оларга: «Мени өлүрер хире буруум чок, мээң медээм Иеговадан» — деп харыылаан. Ынчан нояннар: «Бо кижини өлүрбес» деп шиитпирлээн.

 Иеремия улаштыр суртаалдаарга, нояннар хорадап, Иеремияны өлүрүп кааптарын хаандан дилээн. Хаан оларга: «Ол силерниң холуңарда» — деп харыылаан. Нояннар Иеремияны өлүрер дээш, малгаштыг ханы кудукче киир октапкан. Иеремия малгашка дүжүп эгелээн.

Хаанның ордузунга бараалгап чораан Авдемелех хаанга чугаалаан: «Нояннар Иеремияны кудукче октапты, ону аңаа арттырып каар болзувусса, ол чок апаар». Хаан Авдемелехке үжен кижини эдертип алгаш, Иеремияны кудуктан уштуп алырын чөпшээрээн. Ынчангаш коргушка алыспайн, суртаалдаарын соксатпаан Иеремияның чижээн өттүнээли.