Yehova o khetha Yeremia uri a vhe muporofita wa vhathu vha Yuda. O mu laedza uri a huwelele kha vhathu na u vha vhudza uri vha tea u litsha nḓila dzavho mmbi. Yeremia a ri: ‘Fhedzi Yehova, ndi kha ḓivha mutukana. A thi koni u amba na vhathu.’ Yehova a mu vhudza a ri: ‘Ni songo ofha. Ndi ḓo ni vhudza zwine na fanela u amba. Ndi ḓo ni thusa.’

Yehova a vhudza Yeremia uri a kuvhanganye vharangaphanḓa vha vhathu, a pwashe mvuvhelo phanḓa havho, nahone a ri: ‘Yerusalema u ḓo pwashiwa nga yeneyi nḓila.’ Musi Yeremia a tshi ita zwe Yehova a mu vhudza, vharangaphanḓa vha sinyuwa vhukuma. Tshifhe ane a pfi Pashuri a rwa Yeremia nahone a mu pata nga matanda. Vhusiku hoṱhe, Yeremia o vha a sa koni na u tsukunyea. Pashuri a mu vhofholola nga matsheloni a tevhelaho. Yeremia a ri: ‘A thi tsha kona u konḓelela. Ndi ḓo litsha u huwelela.’ Fhedzi naa o litsha zwa vhukuma? Hai. Musi Yeremia a tshi dovha a humbulisisa nga ha zwenezwi, o ri: ‘Mulaedza wa Yehova u nga mulilo ngomu hanga. Ndi nga si litshe u huwelela.’ Yeremia a bvela phanḓa a tshi vhudza vhathu nga ha khombo.

Nga murahu ha miṅwaha, ha vha na khosi ntswa kha ḽa Yuda. Vhotshifhe na vhaporofita vha mazwifhi vho vha vha tshi vhenga mulaedza wa Yeremia. Vho amba na vhakololo vha ri: ‘Hoyu munna u fanela u fa.’ Yeremia a ri: ‘Arali na mmbulaha, ni ḓo vha no vhulaha muthu a si na mulandu. Ndi amba zwi bvaho ha Yehova, hu si zwanga.’ Musi vhakololo vha tshi pfa zwenezwo, vha ri: ‘Hoyu munna ho ngo fanelwa nga lufu.’

Yeremia a bvela phanḓa a tshi huwelela, nahone vhakololo vha  sinyuwa vhukuma. Vha humbela khosi uri i vhulahe Yeremia. Khosi ya amba uri vha nga ita zwine vha funa nga Yeremia. Vha dzhia Yeremia nahone vha mu posela dindini ḽo tsaho ḽi re na matope, vha tshi humbula uri u ḓo fela henefho. Yeremia a thoma u phirimela thopheni.

Nga murahu, mushumeli wa musanda ane a pfi Ebede-Meleke a vhudza khosi a ri: ‘Vhakololo vho posela Yeremia dindini! Arali ra mu litsha henefho, u ḓo fa.’ Khosi ya laedza Ebede-Meleke uri a ṱuwe na vhanna vha 30 nahone vha bvise Yeremia dindini. Naa a ro nga tea u fana na Yeremia, we a si tendele tshithu na tshithihi tshi tshi mu thivhela u huwelela?