Ginpili ni Jehova hi Jeremias nga magin propeta ha katawohan han Juda. Iya ginsugo hi Jeremias nga sangyawan ngan pahamangnoan hira nga umundang ha pagbuhat hin maraot. Hi Jeremias nagsiring: ‘Pero Jehova, usa la ako nga bata. Diri ako maaram makiistorya ha mga tawo.’ Ginsidngan hiya ni Jehova: ‘Ayaw kahadlok. Isusumat ko ha imo an imo isisiring. Bubuligan ko ikaw.’

Hi Jehova nagsiring kan Jeremias nga tirukon an katigurangan ngan dugmukon ha ira atubangan an usa nga daba, ngan sumiring: ‘An Jerusalem dudugmukon pariho hini.’ Han ginbuhat ito ni Jeremias, nasina gud an katigurangan. Ginkastigo hiya han saserdote nga hi Pasur ngan iginbutang ha pandugan. Ha bug-os nga gab-i, waray hiya makakiwa. Kinabuwasan, ginbuhian hiya ni Pasur. Hi Jeremias nagsiring: ‘Diri ko na kaya. Diri na ako magsasangyaw.’ Pero inundang gud ba hiya? Waray. Han ginhinunahuna niya ito, hiya nagsiring: ‘An mensahe ni Jehova pariho hin naglalaga nga kalayo ha sulod nakon. Diri ko kaya umundang pagsangyaw.’ Padayon nga nagpahamangno hi Jeremias ha katawohan.

Paglabay hin katuigan, an Juda nagkaada bag-o nga hadi. An mga saserdote ngan buwa nga mga propeta nadiri gud ha mensahe ni Jeremias. Ira ginsidngan an mga prinsipe: ‘Angay mamatay ini nga tawo.’ Hi Jeremias nagsiring: ‘Kon patayon niyo ako, papatayon niyo an usa nga inosente nga tawo. An akon ginyayakan mga pulong ni Jehova, diri akon.’ Han hinbatian ito han mga prinsipe, nagsiring hira: ‘Diri angay mamatay ini nga tawo.’

Padayon nga nagsangyaw hi Jeremias, ngan nasina gud an mga  prinsipe. Ginhangyo nira an hadi nga ipapatay hi Jeremias. An hadi nagsiring nga puydi nira buhaton kan Jeremias an bisan ano nga ira karuyag. Gindakop nira hi Jeremias ngan ginhulog ha hilarom ngan malapok nga atabay basi mamatay. Hi Jeremias nagtikaunlod ha lapok.

Tapos, an opisyal han palasyo nga hi Ebed-melek nagsumat ha hadi: ‘Hi Jeremias ginhulog han mga prinsipe ha usa nga atabay! Kon diri naton hiya kuhaon, mamamatay hiya.’ Ginsugo han hadi hi Ebed-melek nga mag-upod hin 30 nga lalaki ngan kuhaon hi Jeremias ha atabay. Waray tuguti ni Jeremias an bisan ano nga makapaundang ha iya ha pagsangyaw. Diri ba maopay nga subaron naton hiya?