Jehovah nifidy Jeremia hatao paminan̈y ta Joda tao. Izy nan̈iraka Jeremia hitory aminolo ndreky hampitandrin̈y iro tsy han̈ano ny ratsy eky. Ho Jeremia: ‘Zaho io mbala hely Jehovah e! Zaho koa tsy mahay mivolan̈a.’ Ho Jehovah taminany: ‘Aza mavozo. Zaho han̈ambara anao zay raha tokony hivolan̈inao. Han̈ampy anao koa zaho.’

Nirahiny Jehovah nikahiny Jeremia antipan̈ahy jiaby. Izy baka tio nanorotoro sajoa tanimanga nan̈oloan̈a iro. Hoizy: ‘Hitorotoroen̈y karaha ty koa Jerosalema.’ Neloko mare antipan̈ahy aby io koa fa naharen̈y zen̈y. Nisy pisoron̈o araiky Pasora an̈arany, namopoko izy, baka io tan̈ana ndreky vitiny Jeremia nigadrainy tamy kakazo firaka andra kiaka. Jeremia tsy afaka nihetsiky foeky. Koa fa kiaka andra, nivahany Pasora izy. Jeremia nivolan̈a: ‘Tsy din̈iko eky ty e. Sitrany zaho tsy hitory eky!’ Jeremia koa fa baka nieritreritry tsarabe, hoizy: ‘Mira motro an̈aty ain̈inaka volan̈a Jehovah, ke tsy vitako tsy hitory zen̈y.’ Nimpody nitory ndraiky Jeremia.

Tafara tatỳ, nisy olo hafa loso panjaka ta Joda tao. Tsy tiandro pisoron̈o ndreky paminan̈y sandoko aby io raha nikoran̈iny Jeremia. Ho iro taminy andriana aby io: ‘Jeremia io man̈eva maty!’ Ho Jeremia: ‘Anaro koa mamono zaho, mamono olo tsy manantsin̈y. Volan̈a Jehovah nambarako anaro fa tsy ninaka.’ Andriana aby io nivolan̈a: ‘Izy tsy mila vonen̈a zen̈y.’

Mbala nitory fo Jeremia, ke neloko mare iro andriana aby io.  Iro nangataka lalan̈a tamy panjaka hamono Jeremia. Nibanjainy panjaka iro nan̈ano zay raha tiandro hatao amy Jeremia. Natsipindro tan̈aty vovo lalin̈y sady feno godra izy, baka hofoaty. Nilentiky tsihelihely tan̈aty godra tao Jeremia.

Nakiry izy nisy piasany panjaka io araiky, Ebeda-meleka an̈arany, nivolan̈a tamy panjaka: ‘Jeremia natsipindro andriana aby io an̈aty vovo e! Hofoaty izy izikoa ambela ao fo.’ Nirahiny panjaka Ebeda-meleka niaraka taminolo 30 lahy, han̈aboaka Jeremia tan̈aty vovo tao. Tsy navozo nitory foeky Jeremia. Tsy tokony han̈ano karaha izy koa ma atsika?