Yehofa ŵamsagwile Yelemiya kuti aŵe jwakulocesya jwa ŵandu ŵa ku Yuda. Jwalakwe ŵamtumile Yelemiya kukwalalicila ŵanduwo soni kukwakalamusya kuti alece yakusakala yaŵatendaga. Nambo Yelemiya ŵajanjile kuti, ‘Yehofa une ndili mwanace, ngangumanyilila mwampaka mbecetele kwa ŵanduwo.’ Pelepo Yehofa ŵamsalile kuti, ‘Mkatenda woga. Cinjimsalila yacimkaŵecete, soni cinjimkamucisya.’

Yehofa ŵamsalile Yelemiya kuti ŵasonganye acimlongola ŵaŵanduwo. Kaneko akase ciŵiga pameso pawo, ni kwasalila kuti, ‘Yelusalemu cacijonanjidwa mpela mwacikasicile ciŵigaci.’ Yelemiya paŵatesile yaŵamsalile Yehofa yila, acimlongolawo ŵatumbile mnope. Jwambopesi Pasuli, jwamputile Yelemiya kaneko ŵamtaŵilile ku matabwa, mwamti Yelemiya nganajenda cilo cosopeco. Kundaŵi kwakwe Pasuli ŵamsalile Yelemiya kuti ajawuleje. Ali atyosile kweleko Yelemiya ŵatandite kuliŵecetela jika kuti, ‘Ngangombolasoni kulalicila, cingambe kuleka.’ Ana yisyene kuti Yelemiya jwalesile kulalicila? Iyayi. Panyuma pakujiganicisya cenene nganiji, Yelemiya jwaŵecete kuti, ‘Utenga wa Yehofa uli mpela moto mumtima mwangu. Ngandeka kulalicila.’ Yelemiya ŵajendelecele kwakalamusya ŵanduwo.

Yaka payamalaga, kwapali mwenye jwasambano ku Yuda. Ŵambopesi soni ŵakulocesya ŵaunami ŵaŵenganaga ni utenga wa Yelemiya. Jemanjaji ŵasalilaga acimlongola ŵala kuti, ‘Munduju akusosekwa kuwulajidwa.’ Ni Yelemiya jwatite, ‘Naga akumbulaga une, akuwulaga mundu jwangalemwa. Nguŵeceta maloŵe ga Yehofa, ngaŵa gangu.’ Acimlongola ŵala paŵapikene yeleyo ŵatite, ‘Munduju ngakusosekwa kuwulajidwa.’

Yelemiya paŵajendelecelaga kulalicila, acimlongola ŵala  ŵatumbilaga mnope. Jemanjajo ŵaŵendile kwa mwenye kuti am’wulaje Yelemiya. Mwenyejo ŵasalile kuti atende yakusaka kwa Yelemiya. Jemanjajo ŵamjigele Yelemiya ni kuja kumponya m’cisima ca matope cakusokoka mnope, ali mkukulupilila kuti cawe basi. Yelemiya jwatandite kutitimila m’matopemo.

Nduna jine lina lyakwe Ebedi-meleki jwamsalile mwenye jula kuti, ‘Acimlongola ŵala amponyisye Yelemiya m’cisima. Naga tukumleka mwelemo jwalakwe cawe.’ Mwenye jula jwamsalile Ebedi-meleki kuti ajigale acalume ŵakwana 30 kuti akamcuwule Yelemiya m’cisimamo. Ana m’weji ngatukusosekwa kuŵa mpela Yelemiya, jwanganakunda cilicose kumlekasya kulalicila?