Jéeobaeʼ tu yéeyaj Jeremías utiaʼal ka u beet u profetail tu luʼumil Judá. Tu yaʼalajtiʼ ka xiʼik kʼaʼaytaj tiʼ le máakoʼob kajaʼanoʼob teʼeloʼ yéetel ka u yaʼaltiʼob ka xuʼuluk u beetkoʼob baʼaloʼob kʼaastak. Chéen baʼaleʼ Jeremíaseʼ tu yaʼalaj tiʼ Jéeoba: ‹Teneʼ chéen juntúul paalen, maʼ in wojel tʼaan tu táan yaʼab máakiʼ›. Jéeoba túuneʼ tu yaʼalajtiʼ: ‹Maʼ a chʼaʼik saajkil, yaan in wáantikech yéetel yaan in waʼaliktech baʼax ken a kʼaʼayt tiʼob›.

Jéeobaeʼ tu yaʼalaj tiʼ Jeremías ka u muchʼkíint u nuuktakiloʼob le kaajoʼ, ka u paʼa junpʼéel nuʼukul de kʼat tu táanoʼob yéetel ka u yaʼaltiʼob: ‹Lelaʼ bey kun úuchul xan tiʼ Jerusalenoʼ›. Ka tu beetaj Jeremías lelaʼ, u nuuktakiloʼob le kaajoʼ jach tsʼíikilnajoʼob. Pasjur, juntúul sacerdoteeʼ, tu lajaj Jeremías, tsʼoʼoleʼ tu kʼalaj tiʼ junpʼéel nuʼukul beetaʼan yéetel tablaʼob yaan u jooliloʼob, lelaʼ ku kʼaabaʼtik cepo. Tiʼ kʼaʼal u yookoʼob yéetel u kʼaboʼob Jeremíasiʼ, bul áakʼab maʼ páajchaj u péekiʼ. Ka sáaschajeʼ chaʼab tumen Pasjur. Ka tsʼoʼokeʼ Jeremíaseʼ, tu yaʼalaj: ‹Way kin náakleʼ. Maʼ kun seguer in kʼaʼaytaj›. Chéen baʼaleʼ, ¿xuʼul wa u kʼaʼaytaj? Maʼatech. Letiʼeʼ tu yaʼalaj: ‹U tʼaan Jéeobaeʼ bey junpʼéel kʼáakʼ ku tóochʼbal ichil in wíinklileʼ. Le oʼolal maʼ tu páajtal in xulik in kʼaʼaytaj›. Jeremías túuneʼ maʼ xuʼul u yaʼalik tiʼ le máakoʼob le baʼax kun úuchloʼ.

Ka máan yaʼab añoseʼ, káaj u gobernar yaanal rey tu luʼumil Judá. Le sacerdoteʼob yéetel le maʼ jaajil profetaʼoboʼ u pʼekmoʼob kaʼach le baʼax ku kʼaʼaytik Jeremíasoʼ. Le oʼolal tu yaʼaloʼob tiʼ le principeʼoboʼ: ‹Le máakaʼ unaj u kíimsaʼal›. Jeremías túuneʼ tu yaʼalaj: ‹Wa ka kíimskeneʼexeʼ, yaan a kíimskeʼex juntúul máak mix baʼal kʼaas u beetmaj. Teneʼ kin waʼalik le baʼax ku yaʼalikten Jéeobaoʼ, maʼ chéen le baʼax kin tuklikoʼ›. Ka tu yuʼubaj le principeʼoboʼ, tu yaʼaloʼob: ‹Le máakaʼ maʼ unaj u kíimsaʼaliʼ›.

 Jeremíaseʼ seguernaj u kʼaʼaytaj, chéen baʼaleʼ le principeʼoboʼ maas pʼuʼujoʼobeʼ ka tu yaʼaloʼob tiʼ le rey ka u kíimsoʼ. Le reyoʼ tu yaʼalajtiʼob ka u beetoʼob tiʼ Jeremías jeʼel baʼaxak u kʼáatoʼobeʼ. Letiʼob túuneʼ bin u machoʼobeʼ ka tu puloʼob ichil junpʼéel taamtan chʼeʼen chuup yéetel luukʼ utiaʼal ka kíimkiʼ. Jujunpʼíitil úuchik u bin u tsʼankʼajal ichil le luukʼoʼ.

Ébed-mélec, juntúul u nojchil le soldadoʼoboʼ, tu yaʼalaj tiʼ le reyoʼ: ‹Le principeʼoboʼ tu puloʼob Jeremías ichil junpʼéel chʼeʼen. Wa maʼ t-jóoʼsikeʼ yaan u kíimil›. Le rey túunoʼ tu yaʼalaj tiʼ Ébed-mélec ka xiʼik yéetel 30 u túulal máakoʼob utiaʼal ka u jóoʼsoʼob teʼ chʼeʼenoʼ. Mix baʼal beet u xuʼulul u kʼaʼaytaj Jeremías. ¿Máasaʼ a kʼáat a beet jeʼex letiʼeʼ?