Gulí Jiobá Jeremías para gaca profeta ndaaniʼ guidxi Judá. Biseendaʼ Jiobá laabe chiguni predicarbe ca binni de guidxi que ne gábibe laacaʼ naquiiñeʼ gusaanacaʼ de gúnicaʼ cosa malu. Peru Jeremías bicabi Jiobá: «Nahuiineruáʼ, qué gánnadiaʼ guiniéʼ nezalú binni». Peru Jiobá gudxi laabe: «Cadi guidxíbiluʼ, naa zacaniáʼ lii ne naa gabeʼ lii xi guiniʼluʼ».

Gudxi Jiobá Jeremías guchiña ca binnigola de guidxi que, guindaa ti jarru de yú nezalúcabe ne gabi laacabe: «Cásica guca jarru riʼ, zacaca zazaaca Jerusalén». Guizáʼ bidxiichi ca binnigola que ora bíʼyacaʼ ni biʼniʼ Jeremías. Gudiñe ti sacerdote láʼ Pasjur Jeremías ne bitiidibe náʼ ne ñee lu caadxi tabla de yaga ni rábicabe cepo. Qué ñanda niniibi Jeremías guidubi gueelaʼ que. De sti dxi siadóʼ que, bindaa Pasjur laabe. Óraque guníʼ Jeremías: «Maʼ qué ganda guneʼ huantar, maʼ qué zuneʼ predicar diaʼ». Peru ¿dxandíʼ bíʼnibe ni la? Coʼ. Guníʼ ique chaʼhuiʼ Jeremías ni cá ique guni ne óraque ná: «Zeeda gaca stiidxaʼ Jiobá casi ti bele ndaaniʼ ladxiduáʼ. Qué zanda gusaana de guneʼ predicar». Ngue runi qué nusaanabe de nitídxibe ca binni que gusaanacaʼ de gúnicaʼ cosa malu.

Gudiʼdiʼ si caadxi iza, bizulú biʼniʼ mandar ti rey cubi ndaaniʼ guidxi Judá. Qué ñuulaʼdxiʼ ca sacerdote ne ca profeta falsu que guiráʼ ni guníʼ Jeremías. Ngue runi gúdxicabe ca príncipe que: «Naquiiñeʼ gatiʼ hombre riʼ». Óraque guníʼ Jeremías: «Pa guutitu naa la? zuutitu ti hombre ni qué gapa donda. Ni gudxi Jiobá naa nga cayabeʼ laatu ne cadi ni ná si iqueʼ». Ora binadiaga ca príncipe que ni guníʼ Jeremías, guniʼcaʼ: «Cadi caquiiñeʼ gatiʼ hombre riʼ».

 Qué ñaanadxí Jeremías de ñuni predicar, peru biaje riʼ huaxa guizáʼ bidxiichi ca príncipe que dede gunábacaʼ rey que guuti Jeremías. Gudxi rey riʼ ca binni que maʼ laacaʼ gúʼyacaʼ xi guninecaʼ Jeremías. Ngue runi gunaazecabe Jeremías ne bisábacabe laa ndaaniʼ ti bizé ni daʼ beñe para gatiʼ raqué. Chaahuiʼ chaahuiʼ biaaziʼ Jeremías ndaaniʼ beñe que.

Ébed-Mélec ti hombre ni runi dxiiñaʼ ndaaniʼ palaciu que guyé ra nuu rey que ne gúdxibe laa: «Bisaba ca príncipe ca Jeremías ndaaniʼ ti bizé. Pa qué cueenu laabe de raca, zátibe». Gudxi rey que Ébed-Mélec chiné 30 hombre para cueecabe Jeremías de ndaaniʼ bizé que. Gastiʼ qué nucueezaʼ Jeremías de ñuni predicar. ¿Cadi dxandíʼ rápaluʼ gana gácaluʼ casi laabe la?