Yekova asia Yeremaya ko du ni nebi fu agu aboro nga ga Yuda yo. Ko aya fuko ko tungusipai fu aboro na ki zayo i mbu manga gbegberẽ apai. Yeremaya aya: ‘Ono Yekova, mi nga tooni gude gbua. Mi ainongo wai ka fura fu aboro te.’ Yekova aya fuko: ‘Ka mo gunde nga ya. Mi nika pe gupai foro si aida mo gumbaha. Mi nika undo ro.’

Yekova aya fu Yeremaya ko dungura agu abaakumba nga ga aboro yo dunduko, ki ta vuro pere ku bangiriyo na ki ya: ‘I nika kuadi Yerusarema wakina gure.’ Ho Yeremaya amangi gupai ni Yekova agumbaha re, abaakumba azingi ni kerehe. Boro motumo nangia Pasura anari Yeremaya na ki kisi ko ku rogo angboro (gu ngua i akiso boro ku rogoho). Gene aadunga be Yeremaya ka guari te, rago agiri ko kina kubako. Pasura azaki ko fuo girarago. Yeremaya ki ya: ‘Ka mi hinga gipai re berewe te. Mi nika mbu tungusapai.’ Ya mo boro ko ambuhe nzunzu? Oó. Ho Yeremaya aberẽkurii gipai re ni berewe gbe, ko aya: ‘Ga Yekova pai rogo re yo wakina we. Ka mi mbunga tungusapai te.’ Yeremaya andu kindi kumbatayo kaa za aboro.

Fuo susa dungu agarã, vovo bakindo akuru berewe Yuda yo. Aboromotumo na ziree anebi ki sogo ga Yeremaya pangbanga. I aya fu abazogo: ‘Si naida ani imi gi kumba re.’ Yeremaya ki ya: ‘Ka oni imi re, gure nga oni imi boro wenesa. Ga Yekova pai du mi agumbaha, gimi te.’ Ho abazogo agi gipai re ni, i aya: ‘Si aidanga ani imi gi kumba re te.’

 Yeremaya aandu kindi kumbatayo na tungusapai, na abazogo ki zingi ni kerehe. I asana bakindo ko imi Yeremaya. Bakindo ki ya fuyo i mangi ko na gupai i aida ka manga ko na ni. I adi Yeremaya ki ba ko ku rogo gu due naadu na dogoro rogoho wa ka ko kpi koyo. Yeremaya atona ka rindo ku rogo dogoro.

Fuani, banyaki sa naadu ngbanga yo nga Ebede-mereke ki ya fu bakindo: ‘Abazogo ima ba Yeremaya ku due yo! Ka ani mbuko koyo ko nika kpi.’ Bakindo azinahe fu Ebede-mereke ko di akumba 30 tipa i ndu ka kusa Yeremaya due yo. Ya mo si aidanga ani du wa Yeremaya naambunga ai pai si ká na ko ti sunge tungusapai ya te?