Jo me Juda guweko Jehovah dok gubedo ka woro lubange me goba. Pi mwaki mapol, Jehovah obedo ka temme me konyogi. En ocwalo botgi lunebi mapol me cikogi, ento gukwero winyo lokke woko. Me kaka meno, gin gubedo ka nywaro lunebi pa Jehovah. Jehovah ogiko timgi me woro cal apaya nining?

Nebukadnejar, kabaka me Babilon, obedo ka turo ker mapatpat. Tyen mukwongo ma en obino i Jerucalem, en omako Kabaka Yekoyakin, rwodi, oteka lweny, ki ludiro tic, ci oterogi ducu i Babilon. Otero bene jami mabeco ducu ma kitiyo kwede i ot pa Jehovah. Ka dong Nebukadnejar oketo Jedekia macalo kabaka ma loyo Juda.

I acakkine, Jedekia obedo lawiny bot kabaka Nebukadnejar. Ento rok mogo macok ki Juda ki lunebi ma lugoba gumiyo Jedekia tam me jemo i kom Babilon. Jeremia ocike ni: ‘Ka ijemo, kibinekowu woko i lweny, dok kec ki two bipoto i Juda.’

I nge loc pi mwaka aboro, Jedekia omoko tamme me jemo i kom kabaka me Babilon. En openyo kony ki bot mony pa jo Ejipt. Kabaka Nebukadnejar ocwalo monnye me lweny i kom Jerucalem, ci gurumo boma man woko. Jeremia owaco bot Jedekia ni: ‘Jehovah owaco ni ka imine keni i cing kabaka me Babilon, ci gibiweki makwo ki boma man bene pe gibiwango ki mac. Ento ka pe, jo Babilon gibiwango Jerucalem woko dok gibimaki macalo opii.’ Jedekia ogamo ni: ‘Pe abimine i cinggi!’

 I nge mwaka acel ki nucu, mony me Babilon omuko cel me Jerucalem woko ci guwango boma man. Guwango ot pa Lubanga, guneko jo mapol, dok gutero jo alip mapol macalo opii.

Jedekia olwi woko ki i Jerucalem, ento mony pa jo Babilon guryemo kore. Gumake cok ki Jeriko ci gukele bot Nebukadnejar. Kabaka me Babilon omiyo Jedekia oneno ki wange ka kineko awobene. Ka dong Nebukadnejar ogolo wang Jedekia woko ci kitweye i buc, ka ma en oto iye lacen. Ento Jehovah ocikke bot jo me Juda ni: ‘I nge mwaka 70, an abikwanyowu adwokowu cen i Jerucalem.’

Ngo ma onongo bitimme i kom jo matino ma kiterogi macalo opii i Babilon? Tika gibibedo lugen bot Jehovah?