Wang’ dupa, thek mi Yuda gibed giweko Yehova man girwo ni mungu m’araga. Pi oro ma pol, Yehova ubed utimo kero nikonyogi. Ebed eoro jubila ma tung’ tung’ pi nitwong’ogi, re giwinjo ngo. Ento gicayu jubila ceke. Yehova utimo ang’o pi nijigo timo migi mi rwo ni ayi gin m’acwia?

Nebukadnezar m’ubimo mi Babeli ubed uvoyo thekman nzu kudhoge. Wang’ ma kwong’a m’evoyo Yerusalem, emaku ubimo Yehoiakin, judongomawijo, jurukara ku jubodho man eterogi ceke i Babeli. Ecoko bende sente ceke mir hekalu pa Yehova. I ng’eye, Nebukadnezar uketho Zedekia ni ubimo mi Yuda.

I acaki, Zedekia uworo Nebukadnezar. Ento thek m’ubedo ceng’ini man jubila mi ndra gicwayu wang’e nia ejai ni Babeli. Yeremia ucime kumae: ‘Kan ijai, jubinegowu, ndru bipodho i wiwu man thong’om bipodho i Yuda.’

I ng’ei ma Zedekia ucamu ker pi oro abora, egam eng’io nijai i kum Babeli. Ekwayu juaskari mi Misiri ukonye. I ng’eye, Nebukadnezar uoro juaskari pare pi nikiedo ku Yerusalem, e gibin gitieko adhura. Yeremia uyero ni Zedekia kumae: ‘Yehova yero nia kan imiyiri i cing Babeli, in karacelo kud adhura ceke wubiboth. Ento kan ijai, Jubabeli gibiwang’u Yerusalem man gibitwii.’ Zedekia udwoko ire kumae: ‘Abimiyara ngo!’

I ng’ei oro acel ku nusu, juaskari mi Babeli ubin urwombo gang’kidi mi Yerusalem man gicwinyo mac i kum adhurane.  Giwang’u hekalu, ginego dhanu dupa man gitwio dhanu elufu swa.

Zedekia uwok kud i Yerusalem man eringo, ento Jubabeli giriemo toke. Gimake ceng’ini ku Yeriko man gitere i bang’ Nebukadnezar. Ubimo mi Babeli uketho junego awiya ma co pa Zedekia i wang’e m’ebeneno. I ng’eye Nebukadnezar uketho juloyo wang’ Zedekia man jubole i kol nitundo etho keca. Ento Yehova ung’olo ni dhanu mi Yuda kumae: ‘I ng’ei oro 70, abidwokowu kendo i Yerusalem.’

Lembang’o ma binwang’u aradu ma jumaku jutero i Babeli? Nyo gibimediri nigwoko bedoleng’ migi ni Yehova?