Јәһудиләр дәфәләрлә Јеһовадан үз дөндәриб сахта аллаһлара ибадәт едирләр. Јеһова узун илләр пејғәмбәрләр ҝөндәрәрәк бу халгы бүтпәрәстликдән чәкиндирмәјә чалышыр. О, онлара хәбәрдарлыг етмәк үчүн чохлу пејғәмбәрләр ҝөндәрир, лакин онлар пејғәмбәрләрин хәбәрдарлыгларына гулаг асмырлар. Әксинә, пејғәмбәрләрә лағ едирләр. Бәс Јеһова халгын арасындакы бүтпәрәстлијә неҹә сон гојур?

Бабил падшаһы Навуходоносор бир-биринин ардынҹа халглары мәғлуб едирди. Биринҹи дәфә Јерусәлимә һүҹум едәндә о, Јәһјакин падшаһы, шаһзадәләри, орду башчыларыны вә сәнәткарлары Бабилә апарыр. О, һәмчинин Јеһованын мәбәдиндәки гијмәтли әшјалары да әлә кечирир. Сонра исә Навуходоносор Сидгијјәни Јәһудаја падшаһ гојур.

Әввәл-әввәл Сидгијјә Навуходоносора итаәт едир. Анҹаг бир мүддәт сонра гоншу халглар вә сахта пејғәмбәрләр она мәсләһәт верирләр ки, Бабилә гаршы үсјан етсин. Лакин Әрәмја пејғәмбәр ону хәбәрдар едир: «Әҝәр үсјан етсән, Јәһудијјәдә ҹинајәт, гытлыг, хәстәлик баш галдыраҹаг».

Сәккиз ил падшаһлыг едәндән сонра Сидгијјә гәрара ҝәлир ки, Бабилә гаршы үсјан етсин. О, Мисир ордусундан көмәк истәјир. Бундан сонра Навуходоносор ордусуна Јерусәлимә һүҹум етмәји әмр едир. Онлар ҝәлиб шәһәрин әтрафында дүшәрҝә салырлар. Бу вахт Әрәмја пејғәмбәр Сидгијјәјә дејир: «Јеһова дејир ки, Бабилә тәслим олсан, сән дә, шәһәр дә хилас олаҹаг. Јох, әҝәр тәслим олмасан, бабиллиләр Јерусәлими јандыраҹаг, сәни дә зиндана атаҹаглар». Сидгијјә исә ҹаваб верир: «Мән тәслим олмајаҹағам!»

 Бир ил јарым кечәндән сонра Бабил ордусу Јерусәлимин диварларыны дағыдыб шәһәрә од вурур. Онлар мәбәди јандырыр, халгы гырыр вә минләрлә инсаны әсир ҝөтүрүрләр.

Сидгијјә Јерусәлимдән гачыр, лакин бабиллиләр онун далынҹа дүшүрләр. Онлар Сидгијјәни Әриһа шәһәринин јахынлығында тутур вә Навуходоносорун јанына ҝәтирирләр. Бабил падшаһы Сидгијјәнин ҝөзү габағында онун оғулларыны өлдүртдүрүр. Сонра исә Навуходоносор онун ҝөзүнү кор едир вә зиндана атыр. Сидгијјә елә зиндандаҹа өлүр. Бүтүн бунлара бахмајараг, Јеһова Јәһудалылара сөз верир: «70 илдән сонра сизи Јерусәлимә ҝери гајтараҹағам».

Бәс Бабилдә зинданда олан ҝәнҹләрин башына нә ҝәлир? Онлар Јеһоваја ҝүвәнәҹәкләр?