Marulak-ulak do halak Juda manadingkon Jahowa jala manomba patung. Nang pe songon i, sai diurupi Jahowa do nasida. Disuru do godang panurirang paingothon nasida, alai ndang ditangihon nasida. Sai diinsahi nasida do angka panurirang i. Aha do na dibahen Jahowa tu patung dohot tu na manomba patung i?

Si Nebukadnesar do raja ni Babel. Ibana do raja na umjago sian bangso na asing. Parjolo sahali ibana ro menyerang Jerusalem, ditangkup do Raja Joiakin, angka pemimpin, angka tentara, angka tukang, jala diboan tu Babel. Dibuat ibana do muse angka barang sian joro ni Jahowa. Dung i, dibahen ibana ma si Sedekia gabe raja ni Juda.

Di mulana, dioloi si Sedekia do si Nebukadnesar. Alai didokkon angka bangso na asing dohot panurirang na jahat ma tu si Sedekia, asa dialo ibana Babel. Dipasingot si Jeremia ma ibana, ‘Molo mangalo ho, masa ma pambunuan, kelaparan, dohot sahit di Juda.’

Dung ualu taon, mangalo do si Sedekia tu Babel. Dipangido ma tentara ni Mesir mangurupi ibana. Disuru si Nebukadnesar ma angka tentarana asa markemah di jonok ni Jerusalem laho manghancurhon kota i. Didok si Jeremia ma tu si Sedekia, ‘Didok Jahowa, molo menyerah ho tu Babel, ndang pamateonna ho jala ndang hancurhononna kota i. Alai molo mangalo ho, tutungon ni halak Babel ma Jerusalem jala tangkuponna ma ho.’ Didok si Sedekia ma, ‘Ndang olo ahu menyerah!’

 Sada satonga taon dungkon i, ro ma muse tentara ni Babel tu Jerusalem jala ditutung ma kota i. Ditutung ma bagas joro, godang ma halak dibunu, jala marribu na ditangkup.

Lari ma si Sedekia sian Jerusalem, alai dikejar halak Babel do ibana. Ditangkup ma ibana di jonok ni Jeriko jala diboan tu si Nebukadnesar. Dipamate raja ni Babel ma angka anak ni si Sedekia di jolona. Dipapitung ma mata ni si Sedekia jala dipenjarahon ma ibana. Dung i mate ma ibana. Alai marjanji do Jahowa tu halak Juda, ‘Dungkon 70 taon, boanonku do hamu muse mulak tu Jerusalem.’

Aha do na masa tu angka na poso na diboan tu Babel? Tongtong do dioloi nasida Jahowa?