IRUẸMWI 58
A Guọghọ E Jerusalẹm Rua
Ẹghẹ hia ẹre Ivbi e Juda ya gha fi iyeke gbe Jehova, iran na gha ga ẹbọ. Ọwara ukpo nibun ẹre Jehova ya gha hoo ne ọ ru iyobọ ne iran. Ọ gie avbe akhasẹ nibun ne iran ya ye obọ sekhae ne iran, sokpan Ivbi e Juda ma họn. Iran na gha ya avbe akhasẹ na gbogiẹ. De vbene Jehova ghi ya muẹn sẹ ufomwẹ hẹ ighẹ uyinmwẹ igẹbọ ọghe iran?
Otọ nibun ẹre Nebukiadnẹza ne ọba ọghe Babilọn wa gha khọn mu vbe ẹghẹ nii. Vbe ẹghẹ okaro ne ọ ya khọnmiotọ yan e Jerusalẹm, ọ na mu Ọba e Jehoiakin, avbe okoro, ivbi iyokuo kevbe avbe owinna gha rrie Babilọn. Ọ na vbe viọ emwi ighobioye ni rre ọgua Osa. Ẹre Nebukiadnẹza na ghi ma e Zedekaia ọba yan otọ e Juda.
Vbe Zedekaia da khian ọba, ọ na gha họn ẹmwẹ ne Nebukiadnẹza. Sokpan agbẹnvbo ni lẹga e Juda kevbe avbe akhasẹ ohoghe keghi bu e Zedekaia ude ne ọ sọtẹ dae Babilọn. E Jerimaia keghi tama rẹn wẹẹ: ‘Adeghẹ u na sọtẹ dae Babilọn, uwu, emianmwẹ kevbe ohanmwẹ ẹre ọ khian ghi gha rre otọ e Juda.’
Vbe ọ ghi rre ukpo erẹnrẹn ne Zedekaia ke kha, ọ na sọtẹ dae Babilọn. Ọ na bu Igipt nọ ru iyobọ ne irẹn. E Nebukiadnẹza keghi gie ivbi iyokuo ọghẹe ne iran gbokin lẹga e Jerusalẹm. E Jerimaia keghi tama e Zedekaia wẹẹ: ‘E Jehova wẹẹ, u gha zẹ egbe obọ ne Babilọn, emwi rhọkpa i khian ru e Jerusalẹm. Sokpan deghẹ u ma na ru vberriọ, Ivbi e Babilọn gha giẹn e Jerusalẹm rua, iran ghi mu ruẹ ye eghan.’ E Zedekaia keghi kha wẹẹ: ‘I i zẹ egbe obọ!’
Vbe ọ ghi rre ukpo ọkpa vbe ukhiọnmwẹ, ivbi iyokuo e Babilọn keghi lae Jerusalẹm, iran na mu erhẹn yọ. Iran na giẹn ọgua Osa, iran na gbele emwa nibun rua, iran na vbe viọ nibun gha rrie imu.
E Zedekaia na te lẹẹ fua, sokpan Ivbi e Babilọn na zẹ ọre khu. Obọ iran na vba re vbe ọkpẹn e Jẹriko, ẹre iran na muẹn gie Nebukiadnẹza. E Nebukiadnẹza keghi gbele ivbi e Zedekaia ye ọre aro. Iyeke ọni, ọ na rhu e Zedekaia aro, ọ na fi ẹre fi uwu eghan, evba ẹre ọ wu yi. Sokpan e Jehova keghi ru eyan ma Ivbi e Juda wẹẹ: ‘Ukpo 70 gha ghi gberra nẹ, I gha werriegbe viọ uwa gha die Jerusalẹm.’
De emwi nọ khian ghi sunu daa igbama na viọ gha rrie imu vbe Babilọn? Iran gha ye gha mwẹ ẹkoata dae Jehova ra?
“Nọyaẹnmwa Osanobua ne Oghodua, ẹmwata ne uhunmwu ẹmwẹ ọre avbe ibuohiẹn ruẹn wa khin.”—Arhie Maan 16:7
