Bôte ya Juda be nga jaé lume Yéhôva mvus, a kañe bivuse bezambe. Yéhôva a nga jeñ abui mimbu na a volô be. Ane a nga lôme abui bekuli mejô na be lebe bôte ya Juda, ve be nga bene vô’ôlô. Be nga kui kui na be kpwe’ele bekuli mejô. Aval avé Yéhôva a nga tyam évus ékaña’a jap?

Nebucadnetsar, njôô ya Babylone, a mbe a dañe meyoñ bita. Éyoñ ôsu a nga nyoñe Jérusalem, a nga kee Njô bôt Jojakim, bivete bié, bezimbi bé a bebo bisaé bé e Babylone. A nga mane fe nyoñ akum ese e mbe temple Yéhôva. Mvuse ya valé, a nga telé Sédécias njôô ya Juda.

Atata’a, Sédécias a mbe a bo’o Nebucadnetsar mewôk. Ve meyoñ ya fefel a bivuse bekuli mejô be nga lebe nye na a kôlô éjôé Babylone si. Nde Jérémie a nga jô nye na: ‘Nge ô kôlô éjôé jé si, mewôé me bôt, mfumbale ya zaé a akon bi aye bo Juda.’

Mvuse mimbu mwom, Sédécias a nga tyi’i na a kôlô éjôé Babylone si. Ane a nga sili nkane bita b’Égyptien mvolan. Nde Nebucadnetsar a nga lôme nkane bita wé na ô ke wosane Jérusalem, ane nkane bita wé ô nga lôñ nka’ale mbôma’ane Jérusalem. Jérémie a nga jô Sédécias na: ‘Yéhôva a jô na, nge ô tabe éjôé Babylone si, wo ye nyii womien a tisone jôé. Ve nge ô kele ôsu a ngan, bôte ya Babylone ba ye di’i Jérusalem, a ba ye kee wo mimbôk.’ Ane Sédécias a nga jô nye na: ‘Teke na me ne beta tabe éjôé jé si!’

 Mvuse mbu wua a étun, bôte ya Babylone be nga bôé minfine ya Jérusalem, a di’i tison ése. Be nga di’i fe temple, a wôé abui bôt; be kele fe betoyini be bôte mimbôk.

Sédécias a nga kui na a tup, ve Bebabylonien be nga leñe nye. Be nga su’ulane bi nye fefele Jéricho, a kee nye be Nebucadnetsar. Ane Nebucadnetsar a nga bo na be wôé bone be Sédécias, émien a lôô. Nde Nebucadnetsar a nga tube Sédécias mis, a futi nye mimbôk, vôm a nga su’ulan wu. Ve Yéhôva a nga bo bôte ya Juda ngaka’a nyi: ‘Mvuse mimbu 70, ma ye bo na mi bulane Jérusalem.’

Jé é nga kui bisoé bi nga ke minkôm e Babylon? Ye be nga ke fo’o ôsu a kabetane Yéhôva?