Zuda mɔgɔw tora k’u kɔɔ di Jehova ma ani ka ngalon alaw bato. Saan caaman kɔnɔ, Jehova y’a ɲini k’u dɛmɛ. A ye kira caaman ci ka taga u lasɔmi, nka sanni u ka mɛnni kɛ, u ye kiraw lɔgɔbɔ. Jehova ye daan sigi cogo di u ka boliw batoli la?

Babilonɛ masacɛ Nebukadnezar tun be duguw minɛna kelen kelen. A siɲɛ fɔlɔ ka Zeruzalɛmu minɛ, a ye masacɛ Yoyakin, kuntigiw, kɛlɛkɛlaw ani bololabaarakɛlaw minɛ ka taga n’u bɛɛ ye Babilonɛ. Nafolofɛn minw bɛɛ tun be Alabatosoba kɔnɔ, a y’u bɛɛ cɛ ka taga n’u ye. O kɔ, Nebukadnezar ye Sedesiyasi kɛ Zuda masa ye.

A daminɛ na, Sedesiyasi tun be mɛnni kɛ Nebukadnezar fɛ. Nka jamana minw tun b’u gɛrɛfɛ, olu ni ngalon kiraw ye Sedesiyasi lasun a murutira Babilonɛkaw bolo. Zeremi y’a lasɔmi ko: ‘N’i murutira, saya, kɔngɔ ani bana lo bena kɛ Zuda jamana na.’

Saan seegi kɛnin kɔ masaya la, Sedesiyasi y’a latigɛ ka muruti Babilonɛkaw bolo. A y’a ɲini Ezipitikaw ka kɛlɛbolo fɛ u k’a dɛmɛ. O tuma na, Nebukadnezar y’a ka kɛlɛbolo ci ka taga Zeruzalɛmu kɛlɛ. U tagara dugu lamini. Zeremi y’a fɔ Sedesiyasi ye ko: ‘Jehova ko n’i ye i yɛrɛ di Babilonɛkaw ma, e ni dugumɔgɔw bena kisi. Nka n’i banna, Babilonɛkaw bena Zeruzalɛmu jɛni ani u bena aw kɛ jɔɔnw ye.’ Sedesiyasi ko: ‘N’ tɛna n’ yɛrɛ di u ma!’

 Saan kelen ni tilan tɛmɛnin kɔ, Babilonɛkaw ka kɛlɛbolo ye Zeruzalɛmu laminikogow sɔgɔ ka don ani u ye dugu jɛni. U ye Alabatosoba jɛni, ka mɔgɔ caaman faga ani u ye mɔgɔ waa caaman minɛ k’u kɛ jɔɔnw ye.

Sedesiyasi bolila ka bɔ Zeruzalɛmu, nka Babilonɛkaw tugura a kɔ. U y’a minɛ Zeriko fan fɛ ka taga n’a ye Nebukadnezar fɛ. Babilonɛ masacɛ y’a to u ye Sedesiyasi dencɛw faga a ɲɛɛ na. O kɔ, a ye Sedesiyasi ɲɛɛw ci ani a y’a don kaso la. A tora yen fɔɔ ka na sa. Nka Jehova ye layidu ta Zuda mɔgɔw ye ko: ‘Saan 70 tɛmɛnin kɔ, ne bena a kɛ aw be kɔsegi Zeruzalɛmu.’

Denmisɛn minw minɛna ka kɛ jɔɔnw ye Babilonɛ, mun lo tun bena olu sɔrɔ? Yala u tun bena to kantigiya la Jehova ye wa?