Mbon Judah ẹma ẹsima ndikpọn̄ Jehovah n̄kokpono nsunsu abasi. Jehovah ama ada ediwak isua odomo ndinam mmọ ẹkpụhọde. Enye ama ọdọn̄ ediwak prọfet esie utom ọnọ mmọ, edi mmọ ikakpan̄ke utọn̄. Mmọ ẹma ẹsisak mme prọfet oro. Jehovah akanam nso man mmọ ẹtre ndikpono nsunsu abasi?

Edidem Babylon emi ekekerede Nebuchadnezzar ama asan̄a an̄wana ekọn̄ akan nsio nsio idụt. Akpa ini emi enye ekedide Jerusalem, enye ama omụm Edidem Jehoiachin, omụm mbọn̄, onyụn̄ omụm mbonekọn̄ ye ata nti mbonutom ọnyọn̄ Babylon. Enye ama atan̄ kpukpru n̄kpọuto ke temple Jehovah ọnyọn̄ n̄ko. Ekem enye ama emek Zedekiah ete akara Judah.

Zedekiah ama osụk ibuot ọnọ Nebuchadnezzar ke ntọn̄ọ ntọn̄ọ. Edi mme idụt emi ẹkekperede mmọ ye mme prọfet abian̄a ẹma ẹdọhọ enye ọsọn̄ ibuot ye edidem oro. Jeremiah ama ọdọhọ enye ete: ‘Edieke afo ọsọn̄de ibuot, n̄kpan̄a ye akan̄ ye idiọk udọn̄ọ oyodụk Judah.’

Ke Zedekiah ama akakara isua itiaita, enye ama ọsọn̄ ibuot ye edidem Babylon. Enye ama ọdọhọ mbonekọn̄ Egypt ẹdin̄wam imọ in̄wana ye Babylon. Edidem Babylon ama ọdọn̄ mbonekọn̄ esie ẹka en̄wan ye Jerusalem. Mmọ ẹma ẹkekan Jerusalem ẹkụk. Jeremiah ama ọdọhọ Zedekiah ete: ‘Jehovah ọdọhọ ke edieke afo ọwọrọde etiene edidem Babylon, afo ye mbon obio emi ẹyebọhọ. Edi edieke mûwọrọke uka, mbon  Babylon ẹyefọp obio emi ẹnyụn̄ ẹmụm fi ẹnyọn̄.’ Zedekiah ama ọdọhọ ete: ‘Ndikaha!’

Ke isua kiet ye ubak ebede, mbonekọn̄ Babylon ẹma ẹbom ibibene Jerusalem ẹdụk ẹnyụn̄ ẹfọp obio oro. Mmọ ẹma ẹfọp temple, ẹwot ediwak owo, ẹnyụn̄ ẹtan̄ ata ediwak owo ẹnyọn̄ọ.

Zedekiah ama efehe, edi mbon Babylon ẹma ẹbịne enye ẹkemụm ke mbọhọ Jericho, ẹda ẹsọk Nebuchadnezzar. Enye ama anam Zedekiah ada ese nte ẹwotde nditọ esie, ekem etịbi enye enyịn, onyụn̄ esịn enye ke ufọk-n̄kpọkọbi. Enye ekesịne do akpa. Edi Jehovah ama ọn̄wọn̄ọ ndinam mbon Judah ẹfiak ẹnyọn̄ ẹdi obio mmọ isua 70 ama ebe.

Nso iketịbe inọ nditọwọn̄ emi ẹketan̄de ẹka Babylon? Ndi mmọ ẹma ẹka iso ẹnam n̄kpọ Jehovah?