Immer und immer wider beted d Lüt vo Juda falschi Götter a statt Jehova. Jehova versuecht ihne jahrelang z helfe. Er schickt vil Prophete, um si z warne, aber si losed nid uf d Prophete. Im Gegeteil, si lached si us. Was macht Jehova, dass niemer meh falschi Götter abetet?

De Nebukadnezar, de König vo Babylon, eroberet eis Land nach em andere. Wo er Jerusalem zum erschte Mal eroberet, nimmt er de König Jojachin, d Männer, wo d Füehrig hend, d Soldate und d Handwerker gfange. Denn bringt er si vo Jerusalem uf Babylon. D Schätz us em Tempel vo Jehova nimmt er au alli mit. Nachher macht er de Zedekia zum neue König vo Juda.

Am Afang lost de Zedekia uf de Nebukadnezar. Aber d Nachbervölker und di falsche Prophete säged ihm, er söll gege Babylon rebelliere. De Jeremia warnt ihn: «Wenn du nüm uf de Nebukadnezar losisch, werded in Juda schlimmi Sache passiere. D Mensche werded chrank sii, Hunger ha und sich gegesiitig umbringe.»

De Zedekia isch scho sit acht Jahr de König, und jetzt entscheidet er sich gliich, gege Babylon z rebelliere. Für das bittet er d Ägypter um Hilf. Uf das abe schickt de Nebukadnezar sini Armee, um Jerusalem z belagere und azgriife. De Jeremia erklärt em Zedekia: «Jehova het gseit: Wenn du dich Babylon ergisch, wirsch du und Jerusalem grettet werde. Aber wenn du dich nid ergisch, werded d Babylonier Jerusalem abebrenne und du wirsch gfange gno.» Aber de Zedekia seit: «Ich söll mich ergee? Nie im Lebe!»

Einehalb Jahr später bricht di babylonischi Armee d Muur vo Jerusalem dure und zündet d Stadt a. D Babylonier brenned de Tempel abe, töted ganz vil Mensche und nehmed Tuusigi gfange.

De Zedekia flüchtet us Jerusalem, aber d Babylonier verfolged ihn. I de Nöchi vo Jericho nehmed si ihn gfange und bringed ihn zum Nebukadnezar. De Zedekia muess zueluege, wie sini eigete Söhn tötet werded. Nachher mached si ihn blind und gheied ihn is Gfängnis. Später stirbt er dört. Em Volk vo Juda verspricht Jehova: «I 70 Jahr bring ich euch uf Jerusalem zrugg.»

Was passiert mit de Chind und de Jugendliche, wo uf Babylon bracht werded? Werded si Jehova treu bliibe?