Wainmatua nakayalaain na chajanakana Judá nuulia Jeʼwaa otta naʼwaajüin tü maleiwayaasükalüirua. Nuluwataaka Jeʼwaa na nünüikimaajanakana süpüla nükaaliinjain naya. Moonooinsat tü wayuukalüirua sümaa nanüiki jee nemeeʼerainpalashii naya. Najaʼttireein maʼin Jeʼwaa tü aʼwaajaakat maleiwayaasü. ¿Kasache naaʼinraka Jeʼwaa süpüla nuuntuin tia?

Nabucodonosor nünülia chi aluwataakai saaʼu Babilonia, wainma pueulo nushutaka aaʼu. Soʼu tü palajatkat nukua sünain ashutaa saaʼu Jerusalén, nütaʼülüin Joaquín, chi aluwataaikai jee na aʼyataakana niʼipajee, nütaʼülüin waneinnua surulaat otta na kuʼyamaliikana. Nüntiraka naya Babiloniamüin. Jee müsia, nülüʼüjain tü korolo kojutusü eejatkat suluʼu tü piichi aʼwaajüleekat Jeʼwaa. Mapa, eʼitaanüshi Sedequías nutuma Nabucodonosor süpüla nuluwataain saaʼu Judá.

Jüüjüüshi Sedequías nümüin Nabucodonosor nuʼttaiwaʼaya sünain aluwatawaa. Nayasaʼa na nünüikimaajanayaakana Maleiwa otta na wayuu kepiakana suluʼu wane pueulo, nootuin nia süpüla niʼrüijaain wayumüin nümüin chi aluwataakai saaʼu Babilonia. Müshi Jeremías nüchiaapa nia: «Piʼrüijaale wayumüin nümüin chi aluwataaikai, eejeerü outaa, eejeerü jamü otta ayuulii yaa Judá».

Sülatapa mekiisat juya, eʼrüijaashi wayumüin Sedequías nümüin chi aluwataakai saaʼu Babilonia. Jee achuntushi kaaliinwaa namüin na surulaat egipciokana. Nuluwataaka Nabucodonosor nusurulaatse sünain ashutaa saaʼu Jerusalén. Noutkalaain Jerusalén na nusurulaatsekana. «Nnojoire pütkaain namaa na chejeʼewaliikana Babilonia naashin Jeʼwaa, oʼttaajeechi pia otta na wayuu kepiakana yaa. Müleka pütkaale namaa, naʼajeerü tü pueulokot Jerusalén otta püreeseechi pia natuma», nümakalaka Jeremías nümüin  Sedequías. Nusoutaka Sedequías: «¡Atkaainjachi taya namaa!».

Wanee juya shiatapünaamüin süchikijee tia, nojuttirüin shiʼipa süsepü Jerusalén na chejeʼewaliikana Babilonia. Ekerotushii naya jee naʼajaka tü pueulokot. Naʼajüin tü piichi aʼwaajüleekat Maleiwa, wainma wayuu noʼutaka aaʼin jee wainma na püreesakana natuma.

Nuʼluwataaka Sedequías Jerusalénjee, jee niipinnaka natuma na surulaatkana. Nütaʼünaka Sedequías peje sünain Jericó otta amaanüshi eemüin chi aluwataakai saaʼu Babilonia. Niasaʼa Nabucodonosor nuʼutirüin naaʼin nüchonnii Sedequías nuʼupalaʼaya. Niyuʼlüin tü noʼukot jee püreesashi nia nutuma. Outushi Sedequías mapa. Naapüin nünüiki Jeʼwaa namüin na chajanakana Judá, anuu nünüiki: «Sülatapa 70 juya, tantireena jia jüchikuaʼa jipialuʼumüin».

¿Jameetche nakuwaʼipa na jimaʼalii jee na majayünnüü amaanakana Babiloniamüin? ¿Ayateenache oonooin naya sümaa nünüiki Jeʼwaa?