Umi hénte oikóva Judápe heta vése oñemomombyry vaʼekue Jehovágui ha omombaʼeguasu umi dios fálsope. Heta áñore Jehová omondo vaʼekue umi profétape oipytyvõ hag̃ua chupekuéra, péro haʼekuéra nohendúi umi kuimbaʼépe ha oñembohory voi hesekuéra. Péro Jehová ndoipotavéima oñemombaʼeguasu umi dios fálsope. ¿Mbaʼépa ojapóta oipeʼaite hag̃ua upéva Judágui?

Pe rréi de Babilonia, Nabucodonosor, ojagarra ohóvo heta tetã. Ojagarra ypýrõ guare Jerusalén, ojagarra kuri rréi Joaquínpe, umi prínsipe, umi soldádo ha artesanokuérape ha ogueraha chupekuéra Babilóniape. Oguerahapaite avei umi tesóro oĩva Jehová témplope. Upéi Nabucodonosor omoĩ Sedequíaspe ogoverna hag̃ua Judápe.

Ñepyrũrã Sedequías ojapo vaʼekue Nabucodonosor heʼíva chupe, péro upéi umi proféta japu ha umi hénte oikóva umi tetã oĩvape ijerére omboliga chupe opuʼã hag̃ua Babilóniare. Péro Jeremías heʼi porã Sedequíaspe: “Repuʼãramo hese, oikóta peteĩ jejukapa guasu, oúta ñembyahýi ha mbaʼasy Judápe”.

Ocho áño haguépe Sedequías opuʼã Babilóniare ha ojerure pe ehérsito egípciope oipytyvõ hag̃ua chupe. Upémarõ Nabucodonosor omondo ijehérsito oataka hag̃ua Jerusalén. Upe ehérsito ou ha oakampa pe siuda jerére. Upépe Jeremías heʼi Sedequíaspe: “Jehová heʼika ndéve reñentregáramo umi babilonio poguýpe rejesalvataha nde ha umi hénte oikóva ko siudápe. Péro nderejapóiramo upéva, umi ehérsito ohapýta Jerusalén ha ndegueraháta hikuái préso”. Sedequías heʼi: “Che nañentregamoʼãi”.

 Un áño imédio haguépe umi babilonio oity peteĩ párte Jerusalén murálla ha oike ohapy pe siuda. Haʼekuéra ohapy avei pe témplo, ojuka heta héntepe ha hetaitereípe ogueraha préso Babilóniape.

Sedequías odipara osẽ Jerusaléngui péro umi babilonio oho hapykuéri. Upéi ojagarra hikuái Sedequíaspe pe siuda de Jericó ypýpe ha oraha chupe rréi Nabucodonosor rendápe. Upépe pe rréi ojukauka Sedequías raʼykuérape henondépe voi. Upe rire ohesaʼo Sedequíaspe ha omoinge chupe kárselpe. Upépe omano vaʼekue Sedequías. Péro Jehová opromete Judápe: “Ohasa rire 70 áño pogueraha jeýta Jerusalénpe”.

¿Mbaʼépa oikóta umi imitã reheve ojegueraha vaʼekuégui Babilóniape? ¿Osegítapa iñeʼẽrendu hikuái Jehovápe ipyʼaite guive?