Liwatliwat nga gintalikdan sang katawhan sang Juda si Jehova kag nagsimba sa butig nga mga dios. Sa sulod sang madamo nga tuig, padayon sila nga ginabuligan ni Jehova. Nagpadala sia sing madamo nga manalagna para paandaman sila, pero wala sila namati. Ginkadlawan pa gani nila ang mga manalagna. Paano gintapos ni Jehova ang ila pagsimba sa butig nga mga dios?

Ang hari sang Babilonia nga si Nabocodonosor padayon nga nagapangsakop sang mga pungsod. Sa una nga bes nga nadaug niya ang Jerusalem, ginbihag niya si Hari Jehoiakin, ang mga prinsipe, mga soldado, kag mga trabahador, kag gindala sila sa Babilonia. Ginkuha man niya ang tanan nga bahandi sa templo ni Jehova. Dayon, ginhimo ni Nabocodonosor si Sedequias nga hari sang Juda.

Sang primero, ginatuman ni Sedequias si Nabocodonosor. Pero ang katupad nga mga pungsod kag butig nga mga manalagna nagsiling kay Sedequias nga magrebelde sa Babilonia. Si Jeremias nagsiling sa iya: ‘Kon magrebelde ka, pamatyon kamo, kag may matabo nga gutom, kag balatian sa Juda.’

Pagkatapos sang walo ka tuig nga paggahom ni Sedequias, nagdesisyon sia nga magrebelde sa Babilonia. Nangayo sia sing bulig sa Egipto. Dayon ginpadala ni Nabocodonosor ang iya mga soldado para salakayon ang Jerusalem, kag nagkampo sila sa palibot sang siudad. Si Jeremias nagsiling kay Sedequias: ‘Si Jehova nagsiling nga kon magsurender ka sa Babilonia, maluwas ka kag ang siudad. Pero kon indi, sunugon sang mga Babilonianhon ang Jerusalem  kag bihagon ka nila.’ Si Sedequias nagsiling: ‘Indi ako magsurender!’

Pagligad sang isa ka tuig kag tunga, nakasulod ang mga soldado sang Babilonia sa mga pader sang Jerusalem kag ginsunog ang siudad. Ginsunog nila ang templo, ginpatay ang madamo nga tawo, kag linibo ang ila ginbihag.

Nakapalagyo si Sedequias sa Jerusalem, pero ginlagas sia sang mga Babilonianhon. Nadakpan nila sia malapit sa Jerico, kag gindala sia kay Nabocodonosor. Ginpakita sang hari sang Babilonia kay Sedequias ang pagpatay sa iya mismo mga bata nga lalaki. Dayon ginbulag ni Nabocodonosor si Sedequias kag ginbilanggo, kag didto na sia napatay. Pero si Jehova nagpromisa sa katawhan sang Juda: ‘Pagkatapos sang 70 ka tuig, pabalikon ko kamo sa Jerusalem.’

Ano ang matabo sa mga kabataan nga gindala sa Babilonia? Mangin mainunungon bala gihapon sila kay Jehova?