Andũ ma Yuta nĩmamũtiaa Yeova mavinda maingĩ, na mayambĩĩa kũthaitha ngai sya ũvũngũ. Kwa myaka mingĩ, Yeova nĩwamatetheeasya. Nĩwatũmie athani aingĩ makamakanyʼe, ĩndĩ mayamethukĩĩasya. Vandũ va ũu, meekaa kũthekeea athani asu. Yeova eekie ata nĩ kana amine ũthaithi ũsu wa ũvũngũ?

Ĩvindanĩ yĩu, mũsumbĩ wa Mbaviloni, ũla weetawa Nevukatilesa, aendeee kũsinda nthĩ ĩmwe ĩtina wa ĩngĩ. Ĩvinda ya mbee yĩla wasindie Yelusaleme, nĩwoosie Mũsumbĩ Yeoiakini, anene, asikalĩ, na andũ me na ũmanyi wa kũthũkũma mawĩa ma moko, na amatwaa onthe Mbaviloni. O na nĩwoosie mothwii onthe ala maĩ ĩkalũnĩ ya Yeova. Na ĩtina wa ũu, Nevukatilesa amũtwʼĩkĩthya Nzetekia mũsumbĩ wa Yuta.

Mbeenĩ, Nzetekia nĩwamwĩwʼaa Nevukatilesa. Ĩndĩ mbaĩ ila syamathyũlũlũkĩte na athani ma ũvũngũ mamwĩie Nzetekia aeke kũmwĩwʼa mũsumbĩ wa Mbaviloni. Nake Yelemia amũkanyʼa Nzetekia amwĩa: ‘Weethĩwa ũte mwĩwi, kũkeethĩwa na ũaani, yũa, na mowau nthĩ ya Yuta.’

Ĩtina wa Nzetekia kũsumbĩka vandũ va myaka nyanya, nĩwatwie kũleana na mũsumbĩ wa Mbaviloni. Kwoou nĩwakũlilye asikalĩ ma Misili mamũtetheesye. Yĩla Nevukatilesa woonie ũu, nĩwatũmie asikalĩ make makavithũkĩe Yelusaleme, na mathi kwĩkala mathyũlũlũkĩte ndũa ĩsu. Yelemia amwĩie Nzetekia atĩĩ: ‘Yeova aĩtye kana weethĩwa wĩ mwĩwi kwa ũsumbĩ wa Mbaviloni, we na andũ ma ndũa ya Yelusaleme mũkavonoka. Ĩndĩ weethĩwa ũte mwĩwi, andũ ma Mbaviloni makavĩvya Yelusaleme vyũ  na maikwosa makumye nthĩ ĩĩ.’ Nzetekia amũsũngĩie Yelemia amwĩa: ‘Ndimwĩwʼa mũsumbĩ wa Mbaviloni.’

Ĩtina wa mwaka ũmwe na nũsu, asikalĩ ma Mbaviloni nĩmavũthũie ngũta sya Yelusaleme, malika, na makwatya ndũa ĩsu mwaki. Nĩmavĩvisye ĩkalũ, moaa andũ aingĩ, na moosa andũ aingĩ mamatwaa kwoo.

Nzetekia nĩwatolokile kuma Yelusaleme, ĩndĩ asikalĩ ma Mbaviloni mamũsembanyʼa. Mamũkwatĩie vakuvĩ na Yeliko na mamũtwaĩa Nevukatilesa. Mũsumbĩ ũsu wa Mbaviloni nĩwooaie syana sya Nzetekia, ũ Nzetekia asyaĩĩsye. Na ĩtina wa ũu, Nevukatilesa amũtonyanga Nzetekia metho na amwĩkya yela vala wesie kũkwʼĩĩa. Ĩndĩ Yeova athie andũ ma Yuta atĩĩ: ‘Ĩtina wa myaka 70, ngamũtũnga mũsyĩ kwenyu Yelusaleme.’

Ĩndĩ nĩ kyaũ kyesaa kũkwata andũ ma mũika ala matwaiwe Mbaviloni? Mo nĩmesaa kũendeea kwĩthĩwa me aĩkĩĩku kwa Yeova?