Bantu ya Yuda vandaka kuyambula Yehowa mbala na mbala mpi kusambila banzambi ya luvunu. Yehowa sadisaka bo na nsungi ya bamvula mingi. Yandi tindaka baprofete mingi sambu na kukebisa bo, kansi bo buyaka kulemfuka. Bo vandaka kuseka baprofete yango. Inki mutindu Yehowa sukisaka lusambu na bo ya biteki?

Nebukadenezare, ntotila ya Babilone, vandaka kubedisa makanda mosi-mosi. Na mbala ya ntete yina yandi bedisaka Yeruzalemi, yandi kangaka ntotila Yehoyakini, bamfumu, basoda, ti bantu ya bisalu ya maboko, mpi yandi nataka bo yonso na Babilone. Yandi bakaka mpi bimvwama yonso ya tempelo ya Yehowa. Na nima, Nebukadenezare tulaka Sidikiya ntotila ya Yuda.

Na luyantiku, Sidikiya vandaka kulemfukila Nebukadenezare. Kansi makanda ya pene-pene mpi baprofete ya luvunu songaka Sidikiya na kukolama na Babilone. Yeremia kebisaka yandi nde: ‘Kana nge kolama, bo ta fwa bantu, nzala mpi maladi ta kota na Yuda.’

Na nima ya kuyala bamvula nana, Sidikiya bakaka lukanu ya kukolama na Babilone. Yandi lombaka lusadisu ya basoda ya Ezipte. Na nima, Nebukadenezare tindaka basoda na yandi sambu na kunwanisa Yeruzalemi, mpi bo ziungaka mbanza. Yeremia songaka Sidikiya nde: ‘Yehowa me tuba nde kana nge kudipesa na bantu ya Babilone, bo ta fwa nge ve mpi bo ta fwa ve mbanza. Kansi kana nge lemfuka ve, bantu ya Babilone ta yoka  Yeruzalemi mpi bo ta nata nge na kimpika.’ Sidikiya tubaka nde: ‘Mono ta kudipesa ve!’

Mvula mosi ti ndambu na nima, basoda ya Babilone bukaka bibaka ya Yeruzalemi mpi bo yokaka mbanza. Bo yokaka tempelo, bo fwaka bantu mingi, mpi bo nataka bantu mingi na kimpika.

Sidikiya tinaka Yeruzalemi, kansi bantu ya Babilone landaka yandi. Bo kangaka yandi pene-pene ya Yeriko mpi bo nataka yandi na Nebukadenezare. Ntotila ya Babilone salaka nde Sidikiya kumona mutindu bo ke fwa bana na yandi. Na nima, Nebukadenezare tobulaka Sidikiya meso mpi tulaka yandi na boloko; yandi fwaka kuna. Kansi Yehowa silaka bantu ya Yuda nde: ‘Na nima ya bamvula 70, mono ta vutula beno na Yeruzalemi.’

Inki ta kumina batoko yina bo nataka na kimpika na Babilone? Keti bo ta bikala ya kwikama na Yehowa?