Andũ a Juda nĩ maatigaga Jehova maita maingĩ na makahoya ngai cia maheeni. No kwa ihinda rĩa mĩaka mĩingĩ, Jehova nĩ aageragia kũmateithia. Nĩ aamatũmagĩra anabii aingĩ nĩguo mamakanie, ĩndĩ matiathikagĩrĩria. Handũ ha ũguo, maanyũrũragia anabii acio maatũmagwo. Jehova aaninire ũhoi wao wa mĩhianano atĩa?

Mũthamaki wa Babuloni wetagwo Nebukadinezaru aatooragia bũrũri ũmwe thutha wa ũrĩa ũngĩ. Riita rĩa mbere rĩrĩa aatharĩkĩire Jerusalemu, nĩ aanyitire Mũthamaki Jehoiakini, anene, thigari, na mabundi, na othe akĩmatwara Babuloni. Aacokire akĩoya indo ciothe cia goro iria ciaigagwo hekarũ-inĩ ya Jehova. Thutha ũcio, Nebukadinezaru nĩ aatuire Zedekia Mũthamaki wa Juda.

Zedekia atuwo mũthamaki o ũguo, nĩ aathĩkagĩra Nebukadinezaru. No mabũrũri marĩa maarigicĩirie Juda o hamwe na anabii a maheeni nĩ meerire Zedekia aregane na Ababuloni. Jeremia nĩ aamũheire mũkaana na akĩmwĩra ũũ: ‘Wamaremera, nĩ gũkũraganwo na kũgĩe na mĩrimũ na ng’aragu gũkũ Juda.’

Thutha wa Zedekia gũthamaka kwa ihinda rĩa mĩaka ĩnana, nĩ aatuire itua rĩa kũregana na Babuloni. Eerire thigari cia Misiri imũteithie. Nake mũthamaki Nebukadinezaru agĩtũma thigari ciake itharĩkĩre Jerusalemu na igĩthiĩ igĩthiũrũrũkĩria itũũra rĩu. Jeremia eerire Zedekia ũũ: ‘Jehova oigĩte atĩ weneana kũrĩ Ababuloni, wee na itũũra rĩa Jerusalemu mũtikwanangwo. No warega gwĩka ũguo, Ababuloni megũcina itũũra rĩa Jerusalemu  na magũkuue magũtware njera.’ Zedekia oigire ũũ: ‘Ndikwĩneana!’

Thutha wa mwaka ũmwe na nuthu, thigari cia Babuloni nĩ ciamomorire thingo cia Jerusalemu na igĩcina itũũra rĩu. Ciacinire hekarũ, ikĩũragana, na igĩtaha andũ aingĩ mũno igĩthiĩ nao.

Zedekia nĩ eetharire kuuma Jerusalemu, no Ababuloni nĩ maamũteng’eririe. Maamũnyitĩire hakuhĩ na itũũra rĩa Jeriko na makĩmũtwara kũrĩ Nebukadinezaru. Mũthamaki wa Babuloni aarekire Zedekia eyonere ariũ ake makĩũragwo. Thutha ũcio Nebukadinezaru nĩ akũũrithirie Zedekia maitho na akĩmũikia njera kũrĩa aacokire gũkuĩra. No Jehova eerire andũ a Juda ũũ: ‘Nĩ ngamũcokia Jerusalemu thutha wa mĩaka 70.’

Nĩ ũndũ ũrĩkũ ũngĩekĩkire harĩ andũ ethĩ arĩa maatwarĩtwo Babuloni? Hihi nĩ mangĩatũũrire marĩ ehokeku harĩ Jehova?