Ovanhu vomuJuda ova li va fiya po Jehova lwoikando ndele tava longele oikalunga. Oule womido dihapu, Jehova okwa kala ta kendabala oku va kwafela. Okwa kala nokutuma ko ovaprofeti vahapu opo ve va londwele, ashike inava pwilikina. Ponhele yaasho, ova kala nokusheka ovaprofeti. Mbela Jehova okwa li e va kwafela ngahelipi va efe po okulongela oikalunga?

Ohamba yaBabilon, Nebukadnesar, okwa kala nokufinda oiwana. Oshikando shotete eshi a finda Jerusalem, okwa li a kwata po ohamba Jojakim, omalenga, ovakwaita nosho yo ovahambuli ndele te va twala aveshe kuBabilon. Natango, okwa kufa mo omamona aeshe motembeli yaJehova. Opo nee Nebukadnesar okwa ninga Sedekia ohamba yaJuda.

Tete, Sedekia okwa kala ta dulika kuNebukadnesar. Ashike oiwana oyo ya li ye va dingilila nosho yo ovaprofeti ovanaipupulu ova li va pa Sedekia omayele opo a tukululile Babilon oshibofa. Jeremia okwe mu londwela ta ti: ‘Ngeenge owa tukulula oshibofa, otaku ka kala omadipao, ondjala nosho yo omikifi muJuda.’

Konima yokupangela omido hetatu, Sedekia okwa li a tokola okutukulila epangelo laBabilon oshibofa. Okwa li a pula etangakwaita laEgipti opo li mu kwafele. Nebukadnesar okwa tuma etangakwaita laye opo li ka ponokele Jerusalem, ndele tava ongo onhanda va dingilila oshilando. Opo nee Jeremia okwa lombwela Sedekia ta ti: ‘Jehova okwa ti ngeenge omwe liyandje kuBabilon, amushe noshilando sheni otamu ka xupifwa. Ashike ngeenge inamu shi ninga, Ovababilon otava ka xwika po Jerusalem ashishe noku ku tula modolongo.’ Ashike Sedekia okwa ti: ‘Itandi ke liyandja.’

 Konima yomudo netata, etangakwaita laBabilon ola li la panuna ekuma laJerusalem ndele tali xwike po oshilando. Ova xwika po otembeli, tava dipaa ovanhu vahapu, nomayovi okwa li a kwatwa po.

Sedekia okwa dja mo onhapo muJerusalem, ashike Ovababilon ova li ve mu taataa. Opo nee ove mu kwatela popepi naJeriko ndele tave mu twala kuNebukadnesar. Ohamba yaBabilon oya li ya dipaifa omonamati waSedekia moipafi yaye. Opo nee Nebukadnesar okwa twiyula Sedekia omesho ndele tai mu tula modolongo, omo a ka fila lwanima. Ashike Jehova okwa li a udanekela Ovajuda ta ti: ‘Konima yomido 70, ohandi ke mu alulila keumbo kuJerusalem.’

Oshike sha li tashi ka ningilwa ovanyasha ovo va li va twalwa moukwatwa kuBabilon? Mbela ova li ngoo tava ka kala ovadiinini kuJehova?