មេរៀនទី៥៨
ក្រុងយេរូសាឡិមបានត្រូវបំផ្លាញ
ម្ដងហើយម្ដងទៀត បណ្ដាជនយូដាបានចាកចេញពីព្រះយេហូវ៉ា ហើយបែរទៅគោរពបូជាព្រះមិនពិត។ ជាច្រើនឆ្នាំមកនេះ ព្រះយេហូវ៉ានៅតែព្យាយាមជួយពួកគេឲ្យកែប្រែ។ លោកចាត់ពួកអ្នកប្រកាសទំនាយឲ្យទៅព្រមានពួកគេ។ ប៉ុន្តែ ពួកគេមិនត្រឹមតែមិនស្ដាប់ទេ បែរជាចំអកមើលងាយពួកអ្នកប្រកាសទំនាយទៅវិញ។ តើព្រះយេហូវ៉ានឹងធ្វើយ៉ាងណាដើម្បីឲ្យពួកគេឈប់គោរពបូជារូបព្រះ?
នៅពេលនោះ ស្ដេចនេប៊ូក្នេសាស្រុកបាប៊ីឡូនបានវាយយកស្រុកផ្សេងៗជាបន្តបន្ទាប់។ លើកដំបូងដែលគាត់វាយដណ្ដើមយកក្រុងយេរូសាឡិម គាត់បានចាប់ស្ដេចយេហូយ៉ាគីន ពួកមេគ្រប់គ្រង ពួកមេទ័ព និងពួកសិប្បករយកទៅស្រុកបាប៊ីឡូន។ នេប៊ូក្នេសាក៏បានប្រមូលយកវត្ថុមានតម្លៃទាំងអស់ក្នុងវិហាររបស់ព្រះយេហូវ៉ាទៅជាមួយដែរ។ រួចមក គាត់តែងតាំងសេដេគាឲ្យធ្វើជាស្ដេចស្រុកយូដា។
ដំបូងឡើយ សេដេគាស្ដាប់បង្គាប់នេប៊ូក្នេសា។ ប៉ុន្តែ ប្រទេសជិតខាងនិងពួកអ្នកប្រកាសទំនាយមិនពិត បានញុះញង់សេដេគាឲ្យបះបោរប្រឆាំងពួកបាប៊ីឡូន។ យេរេមាព្រមានសេដេគាថា៖ ‹បើអ្នកបះបោរ នោះស្រុកយូដានឹងញាំញីដោយសង្គ្រាម ភាពអត់ឃ្លាន និងជំងឺ›។
បន្ទាប់ពីគ្រប់គ្រងបាន៨ឆ្នាំ សេដេគាសម្រេចចិត្តប្រឆាំងនឹងពួកបាប៊ីឡូន។ គាត់បានសុំជំនួយពីកងទ័ពស្រុកអេហ្ស៊ីប។ នេះធ្វើឲ្យនេប៊ូក្នេសាបញ្ជូនពួកទាហានទៅឡោមព័ទ្ធក្រុងយេរូសាឡិមដើម្បីវាយប្រហារ។ យេរេមាប្រាប់សេដេគាថា៖ ‹ព្រះយេហូវ៉ាមានប្រសាសន៍ថា បើអ្នកចុះចាញ់ពួកបាប៊ីឡូន ទាំងអ្នក ទាំងក្រុង នឹងមានសុវត្ថិភាព។ ប៉ុន្តែ បើអ្នកមិនព្រមទេ ពួកបាប៊ីឡូននឹងដុតក្រុងយេរូសាឡិម ហើយចាប់អ្នកយកទៅដាក់គុក›។ សេដេគានិយាយថា៖ ‹ខ្ញុំមិនព្រមចុះចាញ់ជាដាច់ខាត!›។
មួយឆ្នាំកន្លះក្រោយមក ពួកបាប៊ីឡូនបានវាយបំបែកកំពែងក្រុងយេរូសាឡិម។ ពួកគេដុតក្រុង ដុតវិហារ ហើយសម្លាប់មនុស្សជាច្រើន ព្រមទាំងចាប់មនុស្សរាប់ពាន់នាក់ទៀតយកទៅស្រុកបាប៊ីឡូន។
សេដេគាបានរត់ភៀសខ្លួនចេញពីក្រុងយេរូសាឡិម តែត្រូវពួកបាប៊ីឡូនដេញតាម ហើយចាប់គាត់បាននៅជិតក្រុងយេរីខូ រួចនាំគាត់ទៅឯស្ដេចនេប៊ូក្នេសា។ នេប៊ូក្នេសាបានបញ្ជាឲ្យគេសម្លាប់កូនប្រុសរបស់សេដេគានៅចំពោះមុខគាត់។ បន្ទាប់មក នេប៊ូក្នេសាបានចាក់ភ្នែកសេដេគា ហើយដាក់គុកគាត់ រហូតដល់ថ្ងៃគាត់ស្លាប់។ ប៉ុន្តែ ព្រះយេហូវ៉ាបានសន្យានឹងបណ្ដាជនយូដាថា៖ ‹បន្ទាប់ពី៧០ឆ្នាំ ខ្ញុំនឹងនាំអ្នករាល់គ្នាត្រឡប់មកក្រុងយេរូសាឡិមវិញ›។
ចុះយុវជនដែលបានត្រូវចាប់មកស្រុកបាប៊ីឡូន តើពួកគេនឹងទៅជាយ៉ាងណា? តើពួកគេនឹងបន្តស្មោះត្រង់ចំពោះព្រះយេហូវ៉ាឬទេ? សូមបន្តមើលតទៅទៀត។
«ព្រះយេហូវ៉ាជាព្រះដែលមានឫទ្ធានុភាពខ្លាំងក្លាបំផុត ការវិនិច្ឆ័យរបស់លោកគឺសុចរិតយុត្តិធម៌និងគួរឲ្យទុកចិត្ត»។—ការបើកបង្ហាញ ១៦:៧
លោកអ្នកក៏ប្រហែលជាចូលចិត្តដែរ
គម្ពីរបរិសុទ្ធ តើរៀបរាប់អំពីអ្វី?
ស្ដេចល្អនិងស្ដេចអាក្រក់
តើស្រុកអ៊ីស្រាអែលបានត្រូវបែកខ្ញែកទៅជារាជាណាចក្រពីរយ៉ាងដូចម្ដេច?
គម្ពីរបរិសុទ្ធ តើរៀបរាប់អំពីអ្វី?
ព្រះមានប្រសាសន៍តាមរយៈពួកអ្នកប្រកាសទំនាយ
តើពួកអ្នកប្រកាសទំនាយរបស់ព្រះប្រកាសព័ត៌មានបែបណា? សូមពិចារណាគោលរឿងបួនដែលពួកគាត់ប្រកាសប្រាប់។
