Di pipul dɛn na Juda bin kɔntinyu fɔ de lɛf Jiova ɛn wɔship lay lay gɔd dɛn. Fɔ lɔng tɛm, Jiova bin de tray fɔ ɛp dɛn. I sɛn bɔku prɔfɛt dɛn fɔ go wɔn dɛn, bɔt dɛn nɔ bin de lisin. Bifo dat, dɛn bin de provok di prɔfɛt dɛn. Aw Jiova bin stɔp di lay lay wɔship we dɛn bin de du?

Di kiŋ na Babilɔn we nem Nɛbyukadnɛza bin de win neshɔn dɛn wan bay wan. Di fɔs tɛm we i win Jerusɛlɛm, i kapchɔ Kiŋ Jɛoakin, di prins dɛn, di pawaful sojaman dɛn, ɛn man dɛn we sabi du dɛn wok, ɛn i kɛr dɛn go na Babilɔn. I tek bak ɔl di valyu tin dɛn na Jiova in tɛmpul. Dɔn Nɛbyukadnɛza mek Zɛdikaya bi di kiŋ na Juda.

Fɔs, Zɛdikaya bin de obe Nɛbyukadnɛza. Bɔt di neshɔn dɛn we bin de nia dɛn ɛn di lay lay prɔfɛt dɛn bin advays Zɛdikaya fɔ tɔn agens Babilɔn. Jɛrimaya wɔn am se: ‘If yu tɔn yu bak agens dɛn, pipul dɛn go day, bad bad angri ɛn sik go de na Juda.’

Afta we Zɛdikaya dɔn rul fɔ et ia, i disayd fɔ tɔn agens Babilɔn. I aks di sojaman dɛn na Ijipt fɔ ɛp am. Dɔn Nɛbyukadnɛza sɛn in sojaman dɛn fɔ go atak Jerusɛlɛm, ɛn dɛn kamp rawnd di siti. Jɛrimaya tɛl Zɛdikaya se: ‘Jiova se if yu sɔrɛnda to Babilɔn, yu ɛn di siti go sev. Bɔt if yu nɔ du dat, di Babilonian dɛn go bɔn Jerusɛlɛm, ɛn dɛn go kɛr yu go as prizina.’ Zɛdikaya tɔk se: ‘A nɔ go sɔrɛnda!’

 Afta wan ɛn af ia pas, di Babilonian dɛn brok di wɔl dɛn na Jerusɛlɛm ɛn bɔn di siti. Dɛn bɔn di tɛmpul, kil bɔku pipul dɛn, ɛn dɛn kɛr bɔku go as prizina.

Zɛdikaya rɔnawe kɔmɔt na Jerusɛlɛm, bɔt di Babilonian dɛn rɔnafta am. Dɛn kech am nia Jɛriko ɛn kam wit am to Nɛbyukadnɛza. Di kiŋ na Babilɔn mek Zɛdikaya wach we dɛn de kil in bɔypikin dɛn. Dɔn Nɛbyukadnɛza mek dɛn bɔs Zɛdikaya in yay dɛn ɛn put am na prizin, usay i bin leta day. Bɔt Jiova prɔmis di pipul dɛn na Juda se: ‘Afta 70 ia, a go briŋ una bak na Jerusɛlɛm.’

Wetin go apin to di yɔŋ pipul dɛn we dɛn dɔn kɛr as prizina na Babilɔn? Dɛn go kɔntinyu fɔ de biɛn Jiova?