တၢ်မၤလိ ၅၈
ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤ
ပှၤယူဒၤဖိတဖၣ်လဲၤသဒၣ် ယဟိဝၤယွၤတဘျီဘၣ်တဘျီ ဒီးဘူၣ်ထီၣ်ဘါထီၣ်ဝဲယွၤလၢ အကမၣ်တဖၣ်လီၤ. ယဟိဝၤယွၤ ဂုာ်ကျဲးစၢးမၤစၢၤ ပှၤယူဒၤဖိတဖၣ်အိၣ်ဝဲအနံၣ်အါမးလံ. ကစၢ်ယွၤဆှၢလီၤအဝံတဖၣ် ဒ်သိးကဟ့ၣ်ပလီၢ်ဝဲ ပှၤယူဒၤဖိအဂီၢ်လီၤ. ဘၣ်ဆၣ် ပှၤယူဒၤဖိတဖၣ်တဒိကနၣ်ဝဲ ယွၤအဝံတဖၣ် အကလုၢ်ဘၣ်. လၢတၢ်န့ၣ်အလီၢ် အဝဲသ့ၣ်တဲဆါဝဲယွၤအဝံတဖၣ်လီၤ. ခီဖျိလၢ ပှၤယူဒၤဖိဘူၣ်ထီၣ်ဘါထီၣ် တၢ်ဂီၤတၢ်ဖှီၣ်အဃိ ယဟိဝၤယွၤ ကစံၣ်ညီၣ်အဝဲသ့ၣ်ဒ်လဲၣ်.
ဘၤဘူၤလိၣ်အစီၤပၤ နဘူၤကးန့စၢ် ဒုးနၢၤဝဲထံကီၢ်တဘ့ၣ်ဘၣ်တဘ့ၣ်လီၤ. ဖဲစီၤပၤနဘူၤကးန့စၢ် ဒုးန့ၢ်ဝဲဝ့ၢ်ယရူၤၡလ့ၣ် အဆိကတၢၢ်တဘျီန့ၣ် အဝဲက့ၤဖီၣ်ဝဲစီၤပၤယဟိၤယါခံၣ်, ပဒိၣ်ဖးဒိၣ်တဖၣ်, ပှၤသုးဖိတဖၣ် ဒီးပှၤစုသ့ဖိတဖၣ်ဆူ ဘၤဘူၤလိၣ်အပူၤလီၤ. အဝဲက့ၤစိာ်စ့ၢ်ကီးဝဲ တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤ အတၢ်လုၢ်ဟံၣ်အပူၤခဲလၢာ်လီၤ. ဝံၤဒီး စီၤပၤနဘူၤကးန့စၢ် ပာ်ထီၣ်ဝဲစီၤစံးဒကံယၤ လၢယူဒၤအစီၤပၤလီၤ.
အဆိကတၢၢ်န့ၣ် စီၤပၤစံးဒကံယၤဒိကနၣ်ဝဲ စီၤပၤနဘူၤကးန့စၢ်အကလုၢ်လီၤ. ဘၣ်ဆၣ် ထံကီၢ်လၢအိၣ်ဘူးဒီးဝ့ၢ်ယရူၤၡလ့ၣ် ဒီးဝံအဘျၣ်တဖၣ်န့ၣ် ဟ့ၣ်ကူၣ်ဝဲစီၤပၤစံးဒကံယၤလၢ ကထီဒါက့ၤဝဲဘၤဘူၤလိၣ်အစီၤပၤလီၤ. မ့မ့ၢ်ဝံယံးရမံယၤန့ၣ် အဝဲဟ့ၣ်ပလီၢ် စီၤပၤစံးဒကံယၤလၢ– ‘နမ့ၢ်ထီဒါဘၤဘူၤလိၣ်အစီၤပၤန့ၣ် တၢ်မၤသံမၤဝီ, တၢ်သၣ်ဝံၤလီၤဒိ ဒီးတၢ်ဆူးတၢ်ဆါကအိၣ်ထီၣ်ဝဲလၢ ကီၢ်ယူဒၤအပူၤလီၤ.’
ဖဲစီၤပၤစံးဒကံယၤ ပၢတၢ်ပှဲၤထီၣ်ဃိးနံၣ်ဝံၤအလီၢ်ခံ အဝဲဆၢတဲာ်လီၤအသးလၢ ကထီဒါဝဲဘၤဘူၤလိၣ်အစီၤပၤလီၤ. စီၤပၤစံးဒကံယၤဃ့တၢ်မၤစၢၤလၢ ပှၤအဲၤကူပတူးဖိအသုးမုၢ်တဖၣ်အအိၣ် ဒ်သိးကမၤစၢၤအီၤအဂီၢ်လီၤ. ဝံၤဒီး စီၤပၤနဘူၤကးန့စၢ် ဆှၢထီၣ်အသုးမုၢ်တဖၣ် လၢကဒုးဝဲဝ့ၢ်ယရူၤၡလ့ၣ်အဂီၢ် ဒီးအဝဲသ့ၣ်ကဝီၤဃာ်ဝဲဝ့ၢ်လီၤ. ဝံယံးရမံယၤတဲဘၣ် စီၤပၤစံးဒကံယၤလၢ– ‘ယဟိဝၤယွၤတဲဝဲလၢ နမ့ၢ်တူၢ်ၡူနသးလၢ ပှၤဘၤဘူၤလိၣ်ဖိအစုပူၤန့ၣ် နၤဒီးဝ့ၢ်အံၤကပူၤဖျဲးဝဲလီၤ. ဘၣ်ဆၣ် နမ့ၢ်တတူၢ်ၡူ နသးန့ၣ် ပှၤဘၤဘူၤလိၣ်ဖိတဖၣ် ကဒွဲၣ်အူထီၣ်ကွံာ်ဝဲဝ့ၢ်ယရူၤၡလ့ၣ် ဒီးပှၤကက့ၤဖီၣ်နၤလီၤ.’ စီၤပၤစံးဒကံယၤတဲဝဲလၢ– ‘လ့ၤတက့ၤ ယတတူၢ်ၡူယသးဘၣ်.’
တၢ်ဆၢကတီၢ်လဲၤပူၤကွံာ်ဝဲ တနံၣ်ဘျဲၣ်ဝံၤအလီၢ်ခံန့ၣ် ဘၤဘူၤလိၣ်အသုးဖိတဖၣ် မၤဟးဂီၤကွံာ်ဝဲဝ့ၢ်ယရူၤၡလ့ၣ်အတၢ်ဒူၣ် ဒီးဒွဲၣ်အူထီၣ်ကွံာ်ဝ့ၢ်လၢမ့ၣ်အူလီၤ. အဝဲသ့ၣ်ဒွဲၣ်အူထီၣ်ဝဲတၢ်လုၢ်ဟံၣ်, မၤသံပှၤအါအါဂီၢ်ဂီၢ် ဒီးက့ၤစိာ်ပှၤလၢအကထိတဖၣ်လၢ ကကဲကုၢ်အဂီၢ်လီၤ.
စီၤပၤစံးဒကံယၤ ဃ့ၢ်ပူၤဖျဲးအသးလၢ ဝ့ၢ်ယရူၤၡလ့ၣ် ဘၣ်ဆၣ် ပှၤဘၤဘူၤလိၣ်ဖိတဖၣ် လူၤဖီၣ်အီၤလီၤ. အဝဲသ့ၣ်ဖီၣ်န့ၢ်ဝဲ စီၤပၤစံးဒကံယၤဘူးဒီးဝ့ၢ်ယရံၤဃိလီၤ. ဒီးက့ၤစိာ်အီၤဆူ စီၤပၤနဘူၤကးန့စၢ် အအိၣ်လီၤ. ဘၤဘူၤလိၣ်အစီၤပၤ မၢပှၤမၤသံကွံာ် စီၤပၤစံးဒကံယၤအဖိခွါလၢ အမဲာ်ညါလီၤ. ဝံၤဒီးစီၤပၤနဘူၤကးန့စၢ် မၤဘျီၣ်ကွံာ်ဝဲစီၤပၤစံးဒကံယၤအမဲာ်ချံ ဒီးဖၢနုာ်အီၤလၢဃိာ်ပူၤလီၤ. လၢခံန့ၣ် စီၤပၤစံးဒကံယၤသံဝဲဖဲန့ၣ်လီၤ. ဘၣ်ဆၣ် ယဟိဝၤယွၤအၢၣ်လီၤ ပှၤယူဒၤဖိတဖၣ်လၢ– ‘အနံၣ် ၇၀ မ့ၢ်ပူၤကွံာ်န့ၣ် ယကကိးက့ၤသုဆူ ဝ့ၢ်ယရူၤၡလ့ၣ်လီၤ.’
ပှၤသးစၢ်လၢဘၣ်တၢ်က့ၤကိးအီၤ လၢဘၤဘူၤလိၣ်န့ၣ် တၢ်ကမၤအသးဒီးအဝဲသ့ၣ်ဒ်လဲၣ်. မ့ၢ်အဝဲသ့ၣ်ကဆဲးတီဒီး ယဟိဝၤယွၤဒံးဧါ.
“သ့တၢ်လၢာ်ကစၢ်ယွၤဧၢ, နစံၣ်ညီၣ်တၢ်န့ၣ်, မ့ၢ်တၢ်အမ့ၢ်အတီ, ဒီးအတီအလိၤလီၤ.”—လီၣ်ဖျါ ၁၆:၇