Kakavulu, antu amuYuda amushiyileña Yehova nakudifukula kudi anzambi akutwamba. Hadi yaaka yayivulu, Yehova wesekeleña kuyikwasha. Wayitemesheleli atuprofwetu amavulu nakuyisoñamisha, ilaña wena hiyatiyililiku. Ayisupishileña atuprofwetu. Yehova wafumishilihu ñahi kudifukula kwadifukwileñawu kudi ankishi?

Mwanta Nebukaneza wakuBabiloni, washindileña muza-himuza. Mpinji yatachi yashindiliyi Yerusalema, wakwatili Mwanta Yehoyakini, ayilolu, akakuzuña njita niakawukalawenu nakuyitwala wejima wawu kuBabiloni. Wasendeli cheñi nimaheta ejima amutembeli yaYehova. Kuhiñahu Nebukaneza wamwilishili Zedekiya kwikala mwanta waYuda.

Hakusambila, Zedekiya wamwovwahilileña Nebukaneza. Ilaña nyuza yamukamwihi niatuprofwetu akutwamba, amulejeli Zedekiya nawu yadikañi naBabiloni. Yeremiya wamusoñamishili nindi: ‘Neyi wukudikaña, antu muYuda akuyijaha, mukwikala nzala yasweja nimusoñu.’

Chelili nayuuli dehi yaaka 8, Zedekiya wadikañili naBabiloni. Walombeli wukwashu kudi amashidika awaEjipitu. Kuhiñahu Nebukaneza watemesheli amashidika indi nakulukuka Yerusalema nawa akuchikili musumba. Yeremiya wamulejeli Zedekiya nindi: ‘Yehova nahoshi nindi neyi wudihana kudi aBabiloni, eyi nimusumba mukupuluka. Ilaña neyi wukudihana wanyi, aBabiloni akwocha Yerusalema nawa eyi akukutwala mukaleya.’ Zedekiya wahosheli nindi: ‘Nukudihana wanyi!’

Chimwahitili chaaka chimu nachikunku, amashidika awaBabiloni ahumwini mbañu jaYerusalema nawa musumba awocheli. Ocheli  tembeli, ajahili antu amavulu nawa asendeli antu amavulu nakuyisha mukaleya.

Zedekiya watemukili muYerusalema, ilaña eni Babiloni amukumpishili. Amukwatilili kwakwihi naYeriku nawa amutwalili kudi Nebukaneza. Zedekiya wadiña nakutalaku hamujahilileñawu anyanindi kudi Mwanta wakuBabiloni. Kuhiñahu, Nebukaneza wamuputishili Zedekiya mesu nawa wamushili mukaleya, mwafwililiyi mukuhita kwampinji. Ilaña Yehova wayishiikili antu amuYuda nindi: ‘Hanyima yayaaka 70 nakayifuntisha mumukala wenu muYerusalema.’

Chumanyi chadi kumwekana kudi atwansi akwatiliwu nakuyitwala mukaleya kuBabiloni? Komana adi kutwalekahu kwikala ashinshika kudi Yehova?