SAMBILILO 58
Musumba Uwa Yelusalemu Ononwa
Antu ya mu Yuda yatwalilile ukufutatila Yeova nu kutandika ukupepa ya leza ya ufi. Pa myaka iingi, Yeova watwalilile ukuyazwa. Watumanga ya kasesema apusanepusane ku kuyacelula nomba yatuvwanga. Nupya antu kwene yaa, yatumfyanga ya kasesema. Uzye Yeova wacisile uli pakuti alesye ukupepa utulubi?
Nebukadineza umwene uwa ku Babiloni, wacimvyanga umusumba onga na onga. Umuku wa kutandikilapo uno wacimvizye Yelusalemu, walemile Umwene Yeoyakini, ya cilolo, asilika, na ya kasula ya vyela nu kuyasenda yonsi ku Babiloni. Nupya wasenzile ni vyuma vyonsi ivyali umwi tempele lyakwe Yeova. Lyene Nebukadineza wisile Zedekiya ukuya umwene uwa ya Yuda.
Pakutandika, Zedekiya uvwilanga Nebukadineza. Nomba antu aali umu misumba iya mupiipi alino na ya kasesema ya ufi yaneenyile Zedekiya ukuti apondokele umwene wa ku Babiloni. Nomba Yelemiya wamuneenyile ati: ‘Ndi cakuti wapondoka, antu yalafwa, kulaya icipowe, ni ndwala umu mpanga iya Yuda.
Pa cisila cakuti Zedekiya wateeka imyaka 8, wapingwilepo ukupondokela umwene uwa ku Babiloni. Waleenzile uwazwilizyo uku yasilika ya Ina Ijipti. Nebukadineza watumile asilika yakwe ukukuzanza umusumba wa Yelusalemu, nupya yapanzile inkambi ukuzinguluka umusumba. Lyene Yelemiya waneenyile Zedekiya ati: ‘Yeova walanda ukuti ndi cakuti uvwila umwene wa ku Babiloni, ulapusuka nu musumba kwene utalononwa. Nomba nga wakana ukuvwila, Aina Babiloni yaloca umusumba uwa Yelusalemu nu kukusenda umu uzya. Zedekiya walanzile ati: ‘Nemo ntalayuvwila!’
Lino papisile umwaka onga na afu, asilika Aina Babiloni yononyile iviumba ivya musumba uwa Yelusalemu nu ku oca. Yosile itempele, kukoma antu aingi, alino yauze nayo yayasenzile umu uzya.
Zedekiya utwike lino umusumba ononwanga, lelo Aina Babiloni yamulondeliile. Nupya yaile iyamulemela umupiipi nu musumba uwa Yeliko nu kumutwala kuli Nebukadineza. Umwene wa ku Babiloni wakomile ana aonsi yakwe Zedekiya ala Zedekiya akulolako. Lyene Nebukadineza, watonkwile Zedekiya amanso nu kumwika umu cifungo, muno waile afwila. Lelo Yeova walavile Ayuda ukuti: ‘Pa cisila ica myaka 70, alayaswilizya uku Yelusalemu.’
Uzye i vyani vyali nu kucitikila acance aasenzilwe umu uzya uku Babiloni? Uzye yaali nu kutwalilila ukuya acumi kuli Yeova?
“Yeova Leza wa Maka Yonsi, upinguzi wako u wa cumi nupya uulungame.”—Kusokolola 16:7
