Elõñ alen an kar armejin Juda ilo̦k jãn Jeova im kabuñ ñan anij ko rewaan. Im elõñ iiõ in an Jeova kar kajjioñ in jipañ er. Ke ear jilkinl̦o̦k elõñ rũkanaan bwe ren kakkõl er, rar m̦akoko in roñjake im rar kajjirere kake rũkanaan rein. Ta eo Jeova ear kõm̦m̦ane ñan kabõjrak aer kabuñ ñan ekjab ko?

Kiiñ eo an Babil̦on etan Nebukadnezar, ear bõk anjo̦ ioon elõñ aelõñ ko. Ilo iien eo jinointata in an kar anjo̦ ioon Jerusalem, ear kalbuuji Kiiñ Jihoiakin, ruutiej ro, ro rejel̦ã tarin̦ae, kab ro rekapeel ilo jerbal, im bõk er aolep ñan Babil̦on. Ear bar bõk aolep m̦weiuk ko raorõk jãn tampel̦ eo an Jeova. Innem Nebukadnezar ear kairooj Zedekaia bwe en kiiñ ioon aelõñin Juda.

Ilo jinoin, Zedekaia ear pokake Nebukadnezar. Ak ro jãn aelõñ ko repaake Juda kab rũkanaan ro reriab rar ba ñan Zedekaia bwe en jum̦ae aelõñin Babil̦on. Bõtab Jeremaia ear kakkõl e im ba: ‘El̦aññe kwõnaaj jum̦aik er, enaaj wõr ñũta im nañinmej ilo Juda im elõñ renaaj bar mej.’

Ãlikin an kar Zedekaia irooj ium̦win 8 iiõ, ear pepe in jum̦ae aelõñin Babil̦on. Ear kajjitõk ippãn kumi in tarin̦ae eo an aelõñin Ijipt bwe ren jipañe. Innem Nebukadnezar ear jilkinl̦o̦k kumi in tarin̦ae eo an ñan Jerusalem bwe ren itõn ko̦kkure, im rar kaapool̦e jikin in. Jeremaia ear ba ñan Zedekaia: ‘Jeova ej ba bwe el̦aññe kwõnaaj roñjake Babil̦on, kwe kab jikin in kom̦ ban jorrããn. Ak el̦aññe kwõjjab roñjake  er, RiBabil̦on ran̦ renaaj tile aolepen Jerusalem im kalbuuji eok.’ Ak Zedekaia ear ba: ‘Iban roñjake er!’

Juon jimattan iiõ tokãlik, rũttarin̦ae ro an Babil̦on rar rupe wõrwõr eo an Jerusalem im tile jikin in. Rar tile tampel̦ eo ie, m̦an elõñ armej, im bõk elõñ to̦ujin armej im kalbuuji er.

Zedekaia ear ko ke rar ko̦kkure Jerusalem, ak RiBabil̦on ro rar kõpl̦e. Rar jibwe ke ej pãd ilo juon jikin epaake Jeriko im rar bõkl̦o̦ke ñan ippãn Nebukadnezar. Kiiñ in an Babil̦on ear kõm̦m̦an bwe Zedekaia en lale aer m̦an l̦õm̦aro nejin ñan mej. Innem ear kõm̦m̦an bwe en pilo im likũti ilo jikin kalbuuj eo, ijo ear mej ie. Ak Jeova ear kallim̦ur ñan armejin Juda im ba: ‘Ãlikin 70 iiõ, inaaj bar kõjepl̦aak kom̦ ñan Jerusalem, ãneo ãneemi.’

Ta eo enaaj wal̦o̦k ñan jo̦dikdik ro me rar bõk er ñan Babil̦on? Renaaj dãpij wõt ke aer tiljek ñan Jeova?