Judáeuanij miakpa kitlauelkajkej Jehová, uan kinueyichiuayayaj teotsitsij. Jehová nochipa kinejki kinpaleuis. Maske kintitlanki miakej tlajtolpanextianij, inijuantij amo kintlakakilijkej uan san kinuetskiliyayaj. Jehová kinekiyaya ayokmo ma kinueyichiuakaj teotsitsij. ¿Tlake kichijki?

Nabucodonosor, katli tlanauatiyaya ipan Babilonia, moaxkatijtiauiyaya miak altepemej. Kema iyojyok kiteuito Jerusalén kiitskik tlanauatijketl Joaquín, tlayakananij, tlateuianij uan katli kimatiyayaj kichiuaj se tekitl, uan kinuikak Babilonia. Nojkia kiuikak nochi tlamantli tlen pajpatiyo tlen eltoya ipan teokali. Teipa, kitlalik Sedequías ma tlanauati ipan Judá.

Kema Sedequías pejki tekichiua, kichiuayaya tlen Nabucodonosor kiiljuiyaya. Teipa, nopa tlajtolpanextianij katli san istlakatiyayaj uan sekinok maseualmej pejkej kiiljuiaj Sedequías ayokmo ma kitlepanita. Jeremías kiiljuik Sedequías: “Tlaj ayokmo tijneltokas tlanauatijketl tlen Babilonia, miakej kinmiktisej ipan Judá, onkas mayantli uan kokolistli”.

Kema Sedequías tekichijtoya chikueyi xiuitl, ayokmo kinejki kichiuas tlen Nabucodonosor kinauatiyaya, uan kiniljuik egiptoeuanij ma kipaleuikaj. Yeka Nabucodonosor kintitlanki itlateuijkauaj ma kiteuitij Jerusalén. Nopa tlateuianij kiyaualojkej nopa altepetl. Jeremías kiiljuik Sedequías: “Jehová kiijtoua tlaj timotemaktilis, amo tleno mitspanos uan amo tleno kichiuilisej ni altepetl. Uan tlaj amo timotemaktilis, kitlatisej ni altepetl uan ta mitsuikasej Babilonia”. Sedequías kinankilik: “¡Na amo nimotemaktilis!”.

 Kema panok se xiuitl uan tlajko, babiloniaeuanij kiuelonijkej se achi nopa tepamitl tlen eltoya ipan Jerusalén uan nopaya kalajkej. Kitlatijkej nopa altepetl uan nopa teokali. Nojkia kinmiktijkej miakej maseualmej uan sekinok kinuikakej Babilonia.

Maske Sedequías mochololtik, babiloniaeuanij kitepotstokakej uan kiitskitoj nechka Jericó, uan kiuikakej kampa itstoya tlanauatijketl Nabucodonosor. Nabucodonosor kichiualtik ma kiita kenijkatsa kinmiktiyayaj ikoneuaj. Nojkia kiixteyolkixtijkej uan kitsajkej, uan teipa nopaya mijki. Jehová kiniljuik judáeuanij: “Kema panos 70 xiuitl, sampa intlakuepilisej Jerusalén”.

¿Tlake kinpanoskia nopa telpokamej katli kinuikakej Babilonia? ¿Nojua kitekipanoskiaj Jehová?