Mu iyaakha sincipale Yehova aatitelela waakhaviherya achu awe. Owo aanaaruma alipa a miririmu wi yaalopole, nto awo hiyaawiriyana. Achu yaanaanyemula alipa a miririmu. Ikwaha sincipale, achu o Yuteya yaanamuhiya Yehova enaalapa amuluku atheru. Vano Yehova aamalinhe hai olapeliwa amuluku atheru?

Napukotonosori yoowo aari mwene o Papulu aanakuxa ipooma sincipale. Ekwaha yoopacerya amvontheiye Yerusalemu, amphara Mwene Yehoyaki, asitokweene, anakhoco ni anamateka nave aahaakeriha o Papulu. Aakuxa tho muhakhu wa empa ya Yehova. Voocharela, Napukotonosori aamweera Setekiya okhala mwene o Yuteya.

Omapacereryo, Setekiya aanamwiiwelela Napukotonosori. Nyenya maloko awaacamela vamoha ni alipa a miririmu oowoka yaamuleela Setekiya wi ammwareele Napukotonosori. Nto Yeremiya aamulopola ariki: ‘Weyaano wammwareela munahaala okhwa, okhalano etala ni ireca o Yuteya.’

Saavinraaya iyaakha thanu nararu ari mwene, Setekiya aalakelela ommwareela Napukotonosori. Owo aahaaveka anakhoco o Yikuputu wi emukhaviherye. Nto mwene o Papulu aahaaruma anakhoco awe wi erukurerye epooma ya Yerusalemu wi ewaneno. Yeremiya aamuleela Setekiya: ‘Apwiya aaloca muchaka ola: weyaano ni amulapeli aa mwiiperekhe wa mwene o Papulu, wi nvuluwe. Nto wahiiveleela wa mwene, epooma ela enamuya mmatani mwa achu o Papulu.’ Setekiya aahi: ‘Nkini kiiveleele!’

Eyaakha emoha ni emeya ohoolo waya, anakhoco o Papulu yaavolowa mu epooma ya Yerusalemu nave yaatoloxa. Yaaheeyela empa ya Yehova,  yaawiipha achu ancipale, yaahaakuxa akina ntoko akapuro.

Setekiya aachawa o Yerusalemu, nyenya Apapulu yaamwiikara. Yaamphwannyaaya aacamelaka o Yeriko, yaamphara, emukeriha wa Napukotonosori. Mwene o Papulu aaheeriha wi Setekiya awooneke anamwane awe yiiphiwaka. Voocharela, Napukotonosori aampwexa Setekiya miitho nave aamukeriha mukariposo mwemmo aakhwileiyemo. Nyenya Yehova aapaka nlakano ni achu o Yuteya ariki: ‘Savira iyaakha 70, kinamookookiheryaani o Yerusalemu.’

Tiheeni yeeren’ye ni amiravo yaawo yaakerihiwe o Papulu ntoko akapuro? Apwanne yaakhala oororomeleya wa Yehova?